Apalc publics: scemplificaziuns nöies por i Comuns
Les desposiziuns nöies che reverda i apalc publics gnará publicades indoman sön le Boletin ofizial dla Regiun y jará en forza en mercui ai 5 de agost: deache ares messâ gní aprovades de prescia éres gnüdes ajuntades tl articul 11 dla lege nöia sön la cultura.
Cina l’aprovaziun dla lege nöia sön i apalc da d’altonn jôl debojëgn da emané na seria de desposiziuns importantes a bëgn di Comuns y dles impreses che é gnüdes aprovades dal Consëi provinzial tl mëis de messé sön proposta dl presidënt dla Provinzia Arno Kompatscher. La norma nöia ajuntada tl articul 11 gnará publicada tl Boletin dla Regiun indoman y jará en forza en mercui ai 5 de agost. I Comuns, a pert chël de Balsan, podará scrí fora inant autonomamënter bëgns y sorvisc cun n valur sot i 207mile euro y laurs cun n valur plü bas de un n miliun de euro. La desposiziun nöia regolamentëia implü che la prozedöra telematica d’assegnaziun mëss ma gní adorada canche al vëgn scrit fora bëgns, sorvisc y laurs sura i 40mile euro. „Le limit atual ê cina sëgn de 1500 euro. Chësta norma ne garantësc nia ma le prinzip de sussidiarité, mo ara smendrësc ince l’iter burocratich di apalc“, insciö le presidënt Komaptscher. La lege nöia provinziala sön la promoziun dla cultura, aprovada dal Consëi provinzial tl mëis de messé, podará impormó gní publicada do la notificaziun da pert dl’Uniun Europeica.
Tl Boletin dla Regiun gnarál implü publiché dui d’atri decrec: un sön le regolamënt de incompatibilité tla Provinzia y ti ënc publics y privac controlá dala Provinzia y l’ater sön la formaziun spezifica de medejina generala y sön la formaziun de doturs spezialisá. Trami dui i decrec jará en forza en mercui ai 5 d’agost.
rc
