Acoliënza por les porsones che damana do asil y migranc
L’assessuria provinziala por la sanité y les politiches soziales Martha Stocker á mené fora incö ai 4 d’agost na lëtra cun chëra che al vëgn stlarí n valgügn aspec che reverda l’acoliënza dles porsones che damana do asil y di migranc.
En general vëgnel baié de profugs/migranc, mo le Departimënt por les politiches soziales sotlignëia che al é nezesciar da desfarenzié, sot a n profil tecnich, danter porsones che damana do asil internazional, porsones che é sön le iade y che ne á degöna intenziun da fá domanda tla Talia y porsones a chëres che la domanda ti é gnüda azetada da na comisciun y che á ofizialmënter le status de profugs.
Tla lëtra vëgnel sotligné che le prozes de reconoscimënt dl status de profugs döra söporjö un n ann. Ma les porsones che á ciafé chësc reconoscimënt pó gní conscidrades profugs te na valutaziun tecnica y pó insciö gní metüdes sön „le medemo livel“ di atri zitadins dl Stat che i á tut sö. La comisciun pó assegné ince d’atri documënc, sciöche por ejëmpl l’azetaziun de sojornanza por rajuns umanitares.
Te döta la Talia él gnü daurí zëntri d’acoliënza por porsones che á fat domanda d’asil y che se ne é sciampades dai Paisc de residënza porvia de veres, de persecuziuns o de maltratamënc. Chëstes porsones che röia sön les spones dla Talia vëgn partides sö tles Regiuns aladô de na tle de spartiziun dla popolaziun residënta te vigni Regiun. N iade che i profugs röia tl Südtirol ti vëgnel metü a desposiziun strotöres aposta te döt le raiun provinzial. Vigni comunité comprensoriala mëss insciö mëte a desposiziun, aladô dla popolaziun residënta, strotöres d’acoliënza por i profugs.
Chi che manajëia chëstes strotöres mëss ademplí na seria de criters y avëi ince esperiënza tl setur. Al ne basta nia ma da ti garantí n post da dormí y mangé, mo al vá ince debojëgn da i daidé pro le prozes d’integraziun cun cursc d’alfabetisaziun y de lingac. Chëstes ativités vëgn manajades tl Südtirol te na manira otimala dala Caritas y da Volontarius che ciafa n contribut de alplü 28 euro al de por porsona. N aiüt particolar vëgn damané tl momënt che les porsones mëss lascé les strotöres do che ares á ciafé le status de profugh o pó resté tla Talia por rajiuns umanitares.
„N valgönes porsones á damané informaziuns sön che damané por daidé i migranc che á n documënt de sojornanza y che mëss lascé les strotöres d’acoliënza. Al nes é ince gnü pité sostëgn dai zitadins tratan la chirida de n’abitaziun o de n laur y n valgügn mët ince a desposiziun sües abitaziuns por na sistemaziun debann“, spliga l’assessuria Stocker.
Da pert dl Departimënt por les politiches soziales vëgnel sotligné che por pité chësc sorvisc zënza na rëi de sostëgn soziala vál debojëgn da contaté la Caritas (numer de telefon: 0471 304362) o Volontarius (numer de telefon: 0471 402338) ince deache al vá debojëgn de aiüc te chësc vers. Al ne é nia preodü n contribut finanziar da pert dl Stat por chisc caji, insciö le Departimënt, ince sce an alda usc te chësc vers. Ti dé na man a chëstes porsones é n at de solidarieté y umanité y tl medemo momënt n aiüt important por ti conzede da s’inserí plü debota tla sozieté südtiroleja.
rc
