Dala Junta: Aprovaziun dl bilanz supletif
La Junta provinziala á aprové le bilanz supletif de 110 miliuns de euro che taca adöm cun la lege finanziara. Al é preodü n adatamënt de n valgügn articui che reverda la lege sön le personal, cina la fin dl mëis de setëmber él preodü la discusciun tl Consëi provinzial.
Le bilanz supletif prevëiga che 110 miliuns de euro vëgnes metüs a desposiziun aladô de na lista de priorités bele stabilida tl mëis d’aurí. „Na gran pert de chëstes priorités reverda i seturs dla sanité y dl’assiguraziun sön la nia independënza – á splighé le presidënt Arno Kompatscher – che ciafará 38,5 y 30 miliuns de euro. N’atra soma de n cër livel ti gnará garantida al frabiché abitatif alisiré.“
L’obietif dla lege finanziara coliada é indere chël da ciafé le percurs plü asvelt por inserí na seria de mudaziuns legislatives. Danter chëstes él da segnalé ince la revijiun de n valgügn passaji che reverda la lege söl personal. „Do n valgünes valutaziuns critiches da pert de Roma él gnü fat n valgönes mudaziuns, che ne reverda nia la sostanza dl provedimënt che i conscidrun de importanza fondamentala por le dagní dl’aministraziun provinziala“, insciö le presidënt Kompatscher tratan la conferënza stampa.
L’intervënt plü gran reverda l’articul che regolamentëia le pensionamënt antizipé. „Sön chësta materia él le Stat che dij che la Provinzia ne á nia les competënzes por antergní y porchël unse tut la dezijiun da tó demez chësc passaje, ince por evité recursc che podess revardé döta la lege“, insciö Kompatscher. Chësc ne ó porchël nia dí che chësc articul toma completamënter demez, mo che al gnará presenté danü plü inant do avëi daurí na tratativa cun le govern, conscidran ince che la Regiun dla Lombardia á aprové n test identich zënza degöna contestaziun, stlüj jö Kompatscher.
rc
