Dala Junta: lege sön i apalc, scemplificaziuns y sbürles al’economia
„Definí na regolamentaziun tlera, scëmpla y autonoma por ci che reverda la tematica di apalc cun l’obietif da ti dé impulsc nüs ales impreses y cooperatives locales.“ Chësc le messaje zentral dl presidënt dla Provinzia Arno Kompatscher do che la lege provinziala sön i apalc é gnüda debatüda incö (11 d’agost) te Junta.
Segurté iuridica, scemplificaziun burocratica y renforzamënt dl’economia locala: chisc é i trëi pilastri dla proposta de lege nöia sön i apalc debatüda incö, mertesc ai 11 de agost, tla sentada dla Junta provinziala. „Cun na lege sön i apalc nöia ará la Provinzia dl Südtirol na normativa ciamó plü tlera y unitara tla materia“, á stlarí incö, mertesc ai 11 d'agost, le presidënt dla Provinzia Arno Kompatscher.
Le Südtirol sará la pröma regiun taliana, y öna dles prömes a livel europeich, a avëi na lege en materia che tol ite na funziun de governance sön dötes les staziuns d’apalt presëntes sön le teritore. La proposta de lege prevëiga da öna na pert l’adatamënt dles normes atuales a na seria de diretives dl’Uniun Europeica y dal’atra pert l’integraziun de normes ad hoc por la realté südtiroleja che regolamentëia ince la gestiun di apalc cun plü libertés por dötes les aministraziuns publiches locales. „Les ghiranzes da Bruxelles vá propi te chësta direziun y prevëiga n’autonomia plü ampla di ënc che scrí fora i apalc“, insciö Kompatscher. Un di passaji plü importanc reverda le radoplamënt dl valur sot a chël che al sará poscibl da podëi adoré les prozedöres scemplificades dles gares a invic. Le valur é gnü porté da un n miliun a dui miliuns. Implü gnarál ince inserí tla prozedöra standard n’analisa di cosć coliá ala valutaziun dl percurs dl produt, por tigní deplü en conscidraziun la valutaziun dl chilometer zero y ti jí insciö adincuntra a imprejes locales.
Le dessëgn de lege prevëiga implü na seria de scemplificaziuns burocratiches, cun le fin da alisiré les prozedöres aministratives y da ti dé plü segurté iuridica ales impreses che pitará i sorvisc. „Por sostigní la competitivité él preodü de plü alisiraziuns a bëgn dles impreses de dimenjiuns piceres y mesanes, che fej fora gran pert dl’economia südtiroleja. Implü ti gnarál dé plü pëis ala cualité, ai aspec ambientai y soziai, sciöche ince ales produziuns locales“, á dit le presidënt dla Provinzia.
N’atra novité importanta é ince le setur di sorvisc por la porsona cun alisiraziuns preodüdes por les aziëndes no profit, en manira particolara por les cooperatives soziales. „N valgönes bandides podará ma gní scrites fora por düc chi che laora tl setur dl no profit cun n percurs d’apalt por l’assegnaziun di sorvisc ma por les cooperatives soziales“, á stlüt jö Kompatscher. Le test de lege provinziala sön i apalc messará sëgn ciamó passé n iade dal comitê dl’Agenzia por i apalc, ai pröms de setëmber él spo sön le program na discusciun cun les organisaziuns soziales. La lege gnará daldô ciamó n iade ejaminada te Junta, plüssigü ala fin de setëmber dan co passé te Consëi provinzial.
rc
