Laimburg, setur dl’archirida autonom, aministraziun unica
Le proiet de reorganisaziun dl Zënter de sperimentaziun agrara y forestala Laimburg y dl’Aziënda provinziala por l’aministraziun di bosć y dl demane é gnü presenté incö, ai 12 d’agost a Vadena dal assessur Arnold Schuler adöm cun i responsabli di dui ënc. L'obietif é chël da renforzé le Zënter Laimburg sciöche zënter de archirida, aumenté l’efiziënza dles aministraziuns y la segurté di cosć.
Dal 1975, ann dla fondaziun, incá é le Zënter de Sperimentaziun Laimburg n punt de referimënt por l’agricoltöra dl Südtirol reconesciü a livel internazional. Vigni ann manajëia le zënter na gran cuantité de proiec. „Por podëi respogne ales esigënzes atuales che reverda plü mudaziuns ti seturs dl’archirida, dl’inovaziun y dl’aministraziun él nezesciar por le Zënter de sperimentaziun Laimburg da se reorganisé“, á splighé incö ai 12 d’agost l’assessur por l’agricoltöra Arnold Schuler, che á presenté adöm cun le diretur dl Zënter Michael Oberhuber y le diretur dl’Aziënda provinziala por l’aministraziun di bosć y demane, Josef Schmiedhofer le conzet nü. Les rajiuns é de plü, insciö Schuler, danter chëstes le svilup dl’archirida, la cuantité de stüdi che vëgn tres maiú, le svilup dles formes de finanziamënt, n aumënt dl pëis dla burocrazia (normes de segurté, apalc, inovaziuns tecnologiches IT, passaje a n sistem de contabilité nü) y l’ampliamënt y la colaboraziun cun plü seturs dla man publica, sciöche i Urc de Ciastel Trauttmansdorff y i ënc che se crüzia dl zidlamënt di pësc dl Südtirol.
I obietifs dla reorganisaziun é chi da renforzé Laimburg sciöche zënter d’archirida, da aumenté l’efiziënza dl’aministraziun, da arjunje la segurté y trasparënza di cosć y da definí cun prezijiun la gestiun di fonds dl’agricoltöra. Por arjunje chisc obietifs sarál nezesciar da despartí i seturs dl’archirida y dl’aministraziun.
Le proiet de reorganisaziun é gnü elaboré da n grup de laur cun la colaboraziun dl „ROI-Team“. Un di pröms vari concrec sará chël da stabilí regoles tleres che reverda la redefiniziun dl bilanz y dla programaziun, cun colaboradus responsabli da manajé le controlling, le personal, les inovaziuns tecnologiches y la comunicaziun.
L’Aziënda por l’aministraziun di bosć y dl demane, sciöche al é gnü splighé dal diretur de Laimburg Oberhuber, sará n zënter di sorvisc ince por Laimburg y manajará dötes les sperses agricoles y forestales, les aziëndes agricoles y le setur aministratif. Le Touriseum gnará metü sot la gestiun di Urc de Ciastel Trauttmansdorff. L’Ofize Zidlamënt di pësc de Laimburg laurará tl dagní deplü tl setur dl’archirida adöm cun l’Ofize Ciacia y pëscia dla Provinzia.
Politicamënter, insciö le diretur dl Ofize provinzial por l’aministraziun di bosć y demane Schmiedhofer, él la orenté da tigní despartis le setur dles „sciënzes“ y chël dla „gestiun dl teritore“. Por mëte en pratica chësc conzet de reorganisaziun graduala ti proscimi agn gnarál metü da jí n prozes cun plü fases, grups de laur y cursc formatifs por i adatamënc normatifs.
File audio y video:
Retrac reorganisaziun dla Laimburg http://we.tl/JCCNcIP9Zx
Intervista Arnold Schuler http://we.tl/rPeWoMU1CE
Intervista Michael Oberhuber http://we.tl/sDONEnbBks
Intervista Josef Schmiedhoferhttp://we.tl/n9kqAKYO8j
Audio files mp3
(Schuler, Oberhuber, Schmiedhofer)
http://we.tl/B1lfdEYTjC
rc
Galaria dales fotografies
