Campagna cuntra i inzidënc: Spartiziun de jorantis – Nota ince dl ADAC
Sensibilisé sön n rovëne plü sigü é un di obietifs prinzipai dla campagna „No Credit“. Chësc findledema de Santa Maria dai Ciüf gnarál indô partí fora ai motoziclisć sön i jus dl Rombo y dl Stielva jorantis sön le rovëne sigü. Sön dötes les trates dl Südtirol gnarál controlé deplü dales forzes dl ordinn. Ince l’ADAC dl Payern segnalëia i controi.
Consëis importanc sön le rovëne sigü ciafa chësc findledema i bikers che passa sön i jus dl Rombo y dl Stielva cun la spartiziun di jorantins d’informaziun „No Credit“. Implü fajará la polizia comunala tratan chësc findledema de Santa Maria plü controi sön les strades te döt le Südtirol por mosoré la velozité di autisć.
„Cun les aziuns de sensibilisaziun tl contest de No Credit orunse ti recordé a düc i autisć la responsabilité sön strada cun na velozité adatada ales condiziuns dl tëmp, dla strada, dl trafich y dla visibilité“, á splighé l’assessur por la mobilité y le sorvisc strades Florian Mussner. Da pert di motoziclisć él rové ince zoruch na seria de conscidraziuns positives sön les aziuns d’informaziun sön i jus, prezisëia la Repartiziun Mobilité dla Provinzia. Ince l'organisaziun di autisć y bikers todëscia „ADAC (Deutscher Automobilclub)“ á mené fora na comunicaziun olache ara segnalëia ai motoziclisć todësc les aziuns de sensibilisaziun che vëgn metüdes da jí te Südtirol.
Dlungia i controi dla polizia comunala y la spartiziun de jorantis á la campagna de "No Credit" ciamó trëi d’atri pilastri fondamentai. Por aumenté la segurëza di motoziclisć él insciö preodü, sciöche ince ti agn passá, n’ajornamënt costant dla segnaletica y dl’ilomiaziun dles strades, n ressanamënt dl asfalt danejé y l’istalaziun de 2630 metri de tlandri dla strada nüs cun na proteziun aposta por i motoziclisć sön 63 trates dër prigoroses. Inant jará ince la colaboraziun cun le Safety Park, olache i motoziclisć ciafará, mostran le jorantin, ince na diminuziun di cosć por cursc de segurëza y d’ajornamënt al Safety Park.
rc
