Conferënza sön la laurs di andri a San Ciascian ai 21 d’agost
Dl 1987 á l’alpinist Willy Costamoling descurí tl ander de Conturines perts de n schelet de na laurs preistorica. Co êra pa fata? Y cares é pa les desfarënzies da les laurs atuales? A chëstes domandes ti jará a funz le paleontologh Herwig Prinoth te na conferënza organisada dal Museum Ladin ai 21 d’agost dales 21.00 tla Ciasa dles uniuns „J.B.Runch“ a San Ciascian. L'entrada é debann.
L’ander é da ciafé a 2.800 metri sura le livel dl mer sot ala piza de Conturines. Tres i stüdi dl’Université de Viena él gnü fora che i osc dla laurs vá zoruch a zirca 40.000 agn y che la sort de laurs ciafada sön Conturines ne ê nia ciamó gnüda descurida y porchël ára ciafé propi l’inom de „Ursus ladinicus“. Mo co ciarâra pa fora chësta laurs? Y cares é pa les desfarënzies prinzipales danter chës laurs y les laûrs d’aldedaincö?
A chëstes domandes respognará le paleontologh Herwig Prinoth te na conferënza dal titul „La laurs di andri: le Ursus ladinicus y l’ander de Conturines“ che gnará tignida
en vëndres ai 21 d’agost,
dales 21.00
tla Ciasa dles uniuns „J.B.Runch“
a San Ciascian.
L’espert Prinoth presentará ince les particolarité dla laurs de Conturines, i aspec geologics dl habitat natural dl tier, la forma dl ander de Conturines, cina sëgn le post plü alt olache al é gnü ciafé resć de laurs.
La sëra d’informaziun é organisada dal Museum Ladin „Ursus ladinicus“. La conferënza sará por talian. L’entrada é debann. Por plü informaziuns prëibel contaté le Museum Ladin „Ursus ladinicus“ strada Micurá de Rü 26, San Ciascian, tel. 0474 524020, http://www.museumladin.it/.
rc
