Dala Junta: Lege nöia organica sön la mobilité adatada ai criters dl'UE
Por adaté les bandides de concurs tl setur dl trasport publich ales normes europeiches y por renforzé les competënzes legislatives primares dla Provinzia tl setur dla mobilité publica ti confrunc dl Stat á la Junta provinziala aprové incö (25/08) n dessëgn de lege nü sön proposta dl assessur Mussner y che reverda döt le setur. Insciö vëgn dötes les desposiziuns dl setur metüdes te öna na lege.
„La lege atuala che regolamentëia le trasport publich local é gnüda aprovada dl 1985 y mëss insciö gní ajornada ales prescriziuns dl’Uniun Europeica, dantadöt por ci che reverda les conzesciuns di sorvisc dl trasport publich local che gnará scrites fora danü ala fin dl 2018“, spliga l’assessur por la mobilité Florian Mussner. Sciöche preodü dal’UE dess les conzesciuns gní surandades tres n concurs publich, che ará le focus sön l’efiziënza y la cualité di sorvisc, sön n paiamënt adaté ai bojëgns de düc y sön la proteziun di colaboradus y lauranc.
Pro l’assegnaziun di sorvisc – recorda l’assessur competënt – gnarál dantadöt tigní cunt di faturs soziai, dla sconanza dl ambiënt y dla contrada. Tl setur dla mobilité él implü gnü a se le dé de plü regolamentaziuns statales nöies; é le dessëgn de lege á ince l’obietif da renforzé la competënza legislativa primara dla Provinzia te chësc setur en confrunt ales normes statales, insciö l’assessur por la mobilité. Insciö vëgnel nominé tl dessëgn de lege les competënzes legislatives primares che reverda le trasport feroviar y les infrastrotöres che taca lapró, le regolamënt dles ativités d’imprëst d’auti y corieres sciöche ince pro l’aeroport.
La dessëgn de lege regolamentëia na seria de seturs daldöt danü, dantadöt por ci che reverda l’assegnaziun y i contrac di sorvisc, i paiamënc che reverda i sorvisc dles corieres y dles ferates por le trasport publich local, i sorvisc dl schibus y di shuttles, dl trasport spezial di scolars, les infrastrotöres y le material tl setur dles corieres y ferates, l’aeroport, i investimënc, i sorvisc d’imprëst de auti y corieres, les relaziuns cun i viajadus y i sorvisc d’informaziun. „Por le pröm iade vëgnel integré te un n dessëgn de lege dötes les normes che reverda la mobilité publica y che é sëgn da ciafé te normes desfarëntes. N ater vantaje é la scemplificaziun dles normes, por che ares pois gní capides da düc i zitadins“, insciö Mussner. Por le pröm iade vëgnel ince regolamenté cun na lege provinziala les desposiziuns che reverda i sorvisc d’imprëst dles corieres, di taxi y di auti (cina 9 posć).
Öna dles priorités dla proposta de lege é le renforzamënt dl’economia dl teritore y la promoziun dla concorënza danter les impreses por ti pité ai zitadins n sorvisc efiziënt y de buna cualité a n bun prisc“, sotlignëia l’assessur por la mobilité. Le dessëgn de lege nü prevëiga ince la poscibilité de n’assegnaziun direta a sozietés inhouse dla Provinzia. N gran pëis ti él gnü dé cun le dessëgn de lege nü ince ala proteziun di lauranc y colaboradus tl setur dla mobilité publica. Insciö él gnü inserí la norma che i manajadus di sorvisc é obliá da adoré les normes varëntes di contrac coletifs y di contrac ajuntifs dl setur, y implü mëssel gní mantigní i dërc arjunc di lauranc por ci che reverda le paiamënt, i agn de sorvisc y la profesciun.
„Por ti corespogne deplü ales esigënzes di zitadins vëgnel ince renforzé le dërt de rapresentanza dla Zentrala di Consumadus canche ara nen vá de chestiuns di anuzadus dl sorvisc de trasport publich“, insciö l’assessur Mussner. La Zentrala di Consumadus podará insciö dé jö na tuta de posiziun sön le contrat general y sará presënta ince tratan les tratatives cun i manajadus di sorvisc canche ara nen jará dla garanzia cualitativa di sorvisc.
N ater punt important é por l’assessur Mussner ince la poscibilité da fá acordanzes cun les istituziuns dl’Euregio y che la colaboraziun tl setur dla mobilité danter les regiuns dl Tirol, Südtirol y Trentin é por le pröm iade ince sotlignada te na lege.
Implü regolamentëia la proposta de lege te na manira tlera cai che é i compic dla Provinzia, di Comuns y dles sozietés inhouse dla Provinzia. Le stromënt prinzipal de planificaziun dl trasport local dles porsones y dla rëi d’infrastrotöres ará tl dagní le plann provinzial dla mobilité, che stabilësc i raiuns por les bandides di concursc di sorvisc, i criters por i sorvisc minimai y la balanza danter i bojëgns finanziars y les startegies ecomiches, soziales y sostenibles.
Da söporjö n ann él gnü organisé de plü incuntades cun i rapresentanc dl Consëi di Comuns, dles Comunités raionales, di manajadus di sorvisc, di sindacac interssá, dla Zentrala di Consumadus y dles organisaziuns di lauranc y colaboradus, tratan chëres che al é gnü presenté y debatü le dessëgn de lege. Do la discusciun y aprovaziun dl dessëgn de lege da pert dl Consëi provinzial gnarál aprové le plann provinzial dla mobilité publica cun na reorgansaziun di raiuns. Daldo podarál spo gní ponü la basa por les bandides de concurs por i sorvisc dl trasport publich local. Tl'aisciöda dl 2018 dessel spo gní firmé i contrac de gestiun di sorvisc nüs por ester en regola cun les prescriziuns europeiches tl mëis de novëmber dl 2018.
rc
