Dala Junta: fonds nüs por le program dla banda leria
Le proiet dla junta provinziala da amplié y renforzé la rëi a banda leria tl Südtirol vá inant. Por jí inant cun le program di laurs preodüs por le 2015, á l’esecutif aprové incö (ai 25 d’agost) i intervënc proponüs dala RAS, meton a desposiziun feter 1,4 miliuns de euro.
Cherié na rëi sora, daverta, che cür döt y publica, che é buna da condüje coliamënc internet da na gran velozité a impreses y families dl Südtirol: chësc é l’obietif dla Junta provinziala sön la banda lëria, setur olache an investësc tres ciamó sön döt le teritore. “Ara nen vá de n’infrastrotöra fondamentala por la competitivité – á sotrissé le presidënt dla Provinzia Arno Kompatscher – le rode dla banda lëria pó gní paridlada aldedaincö cun chël dles strades ti ultimi dejenas dl secul passé; ara vá a vigni moda debojëgn da condüje azesc web da na gran velozité ince ti raiuns plü periferics dl Südtirol”.
Porchël él gnü lauré fora le program 2015-2016 dala RAS y aprové incö (ai 25 d’agost) dal esecutif provinzial. Al vëiga danfora investimënc por indöt 5.900.000 euro por realisé i PoP dla rëi telematica provinziala, n valgügn toc de rëi por colié la trassa prinzipala y colié cun la fira otica i repetidus RAS. “Le finanziamënt oget dla deliberaziun – dij l’assessuria por l’informatica Waltraud Deeg – é de 1,4 miliuns de euro y reverda le completamënt de n valgönes trasses da anuzé da Telecom Italia por ajorné sües zentrales dl telefon y garantí insciö l’azes internet da na gran velozité”.
Danter i laurs prinzipai finanziá dala junta él chi de Lapach, dla periferia de Porsenú (Vahrn, Albeins, Milland), de Vöran y de Mühlbach. “L'Europa –á stlüt jö Kompatscher – ó ti garantí cina le 2020 coliamënc internet da na gran velozité (altamo 30 Mbit/s) al 50% dla popolaziun, deperpo che la Talia ó ti proscimi 5 agn ti pité al 85% dla popolaziun azesc web a 100 Mbit/s. Chisc travërc é ince tl’ajënda “Südtirol digital 2020” y nosta strategia roda incër trëi pilastri: anuzé le plü che ara vá les sinergies pro le svilup dles infrastrotöres, adoré n mix de tecnologies a banda leria y pité mosöres concretes de sostëgn daidan ince i comuns”.
osp
