Trasport publich local: Tarifes nöies dal 1 de setëmber
Dal 1 de setëmber dl 2015 él tarifes nöies, na tassa d’emisciun da paié ma un n iade y na tarifa al de mascimala por le Südtirol Pass, sciöche ince tarifes nöies por tó para la roda. „Le sistem dles tarifes dl Südtirol é en confrunt cun i sistems tarifars europeics le plü orienté tl vers di anuzadus y, calcolé sön basa anuala, ince chël a miú prisc“, insciö l'assessur Florian Mussner.
Do da l’introduziun dl conzet dl „Südtirol Pass“ dan da trëi agn y mez á le sistem tarifar desmostré da funzioné bun, cun tröc vantaji por i anuzadus y cun n aumënt costant di viajadus. Impó messël gní ciaré da curí de plü i cosć dl sistem dl trasport publich local, insciö l’assessur por la mobilité Florian Mussner. „N fatur important é sté pro l’adatamënt dles tarifes da ne fá nia paié deplü pendolars y viajadus che vá tröp cun i mesi dl trasport publich y le Südtirol Pass costa inant alplü 640 resp. 530 euro al ann“, sotlignëia l’assessur Mussner.
Aladô dles prescriziuns nazionales y europeiches mëss almanco le 35 porcënt di cosć dl sorvisc dl trasport publich local gní curí dal paiamënt dles tarifes, por le momënt fej chësta soma fora le 24 porcënt. „N adatamënt dles tarifes é ince nezesciar por podëi mantigní le standard de cualité atual dl trasport publich local y por realisé ince ti proscims agn plü proiec che reverda la mobilité sostenibla“, insciö le diretur dla Repartiziun Mobilité Günther Burger. Cun l’adatamënt aprové dala Junta provinziala l’ann passé él gnü fat n ater vare important por arjunje chësc obietif.
Südtirol Pass: les tarifes nöies dal 1 de setëmber dl 2015
Dal 1 de setëmber dl 2015 se müda les tarifes dl Südtirol Pass: i chilometri fac cina sëgn romagn y vëgn metüs dal 1 de setëmber diretamënter pro la tarifa che alda lapró. Deperpo che al sará da paié por i pröms 2000 km al ann tl dagní deplü, n’ará les tarifes nöies manco o feter degöna faziun sön les atres tarifes. Da 10.000 km al ann fac insö romagn i cosć anfat.
| Tarifa di km fac al ann | Südtirol Pass tarifa normala | Südtirol Pass tarifa por la familia |
|
|
|
|
| 0 cina 1.000 km | 12 centejimi/km | 10 centejimi/km |
| 1.001 cina 2.000 km | 8 centejimi/km | 7 centejimi/km |
| 2.001 cina 10.000 km | 3 centejimi/km | 2 centejimi/km |
| 10.001 cina 20.000 km | 2 centejimi/km | 2 centejimi/km |
| da 20.001 km insö | 0 centejimi/km | 0 centejimi/km |
|
|
|
|
| cosć al ann | max. 640 euro sciöche denant | max. 530 euro sciöche denant |
Cina sëgn n’él gnü ghiré nia por lauré fora, de ca o ortié le Südtirol Pass, gnanca por i cosć dla posta. Dal 1 de setëmber mësson paié por les domandes nöies na tassa d’emisciun de un n iade de 20 euro por le Südtirol Pass. Impormó canche i arëis paié la tassa jarára da ativé le Südtirol Pass. La tassa d’emisciun pó gní paiada sciöche pro le Südtirol Pass postpaid tres la banca o:
- cun contanc pro la portina mostran le Südtirol Pass;
- online cun cherta de credit canche an fej domanda o daldô sön le cunt dl utënt dl Südtirol-Pass dan dant le numer dl contrat y la misciun e-mail;
- tres home-banking pro i istituc de credit autorisá.
Sce le Südtirol Pass vëgn ortié foradecá mëss la tassa de 20 euro por l’emisciun dl Südtirol Pass gní paiada damperfora. Te chësc caje vára ma da paié online tres cherta de credit o cun chertes postpaid tres la banca. Sce an rüna le Südtirol-Pass o sce an le perd costel inant 20 euro da fá n duplicat.
Dal 1 de setëmber inant vëgnel metü sö por le Südtirol Pass na tarifa al de mascimala de 15 euro, che é tan co le cost de na Mobilcard al de. Chël ó dí: ince sce i fajëis dër tröc chilometri, paiëse alplü ma 15 euro cun le Südtirol Pass. Chësc vel sambëgn ma por iadi daite dal raiun de competënza dl trasport publich dl Südtirol, chël ó dí sön les linies cina Trënt, cina al Prener y cina Vierschach-Helm.
Ajache al costa de regola anfat ince por tó para tiers sön i mesi dl trasport publich vel la tarifa mascimala de 15 euro ince por cians mesans y de gran cians; por cian y patrun vëgnel porchël calcolé indöt alplü 30 euro. Por tó para tiers ne gnarál inant nia calcolé km sön le cunt dl utënt.
I iadi cun la ferata Prener-Desproch y Sanciana-Lienz, i iadi cun i bus dl Nightliner y por tó para la roda vëgn calcolá a pert.
Dal 1 de setëmber velel tarifes nöies por tó para la roda sön i mesi dl trasport publich:
- 3,50 euro al de (bel anfat tan de iadi y tan lunc che an vá) por che che á le Südtirol Pass, sciöche ince le abo por scolars y seniors cun funziuns de paiamënt implü;
- cherta al de ma por la roda da 7,00 Euro por dötes les porsones che á d’atres chertes y d’atri abo.
Tó para la roda sön i mesi dl trasport publich ne gnará tl dagní nia plü cumpedé lapró sön le cunt di km de che che á le Südtirol-Pass.
rc
