L’Ispeturia Crazzolara vá en ponsiun: 40 agn al sorvisc dla scora ladina
Sura 40 agn á Romi Crazzolara lauré te plü inciaries pro les scores dles valades ladines. Naota sciöche maestra, spo sciöche direturia dles scores elemetares dla Val Badia y dla direziun de Mareo y dal 2009 sciöche ispeturia dles scores ladines. „Cun süa profescionalité, dediziun, competënza y respet ára dé n gran contribut por nosta scora ladina y por la formaziun de vita“, insciö l’ass. Mussner.
„Da sis agn á Romi Crazzolara manajé l’inciaria dl’Ispetorat dles scores ladines cun gran savëi, competënza y profescionalité“, sotlignëia l’assessur por les scores ladines Florian Mussner. Crazzolara ne é insciö nia ma stada n’ispeturia dër aprijiada dales colaboradësses y dai colaboradus dl’Intendënza scolastica ladina, mo ince dai scolars, maestri y direturs, cun chëra che al é tres sté meso da avëi n bun raport de colaboraziun y che á porté a de bugn früc dantadöt por le dagní dl sistem scolastich, insciö l’assessur. Ince por l’intendënt dles scores ladines Roland Verra „á Crazzolara, te sües inciaries desfarëntes, naota sciöche maestra, spo sciöche direturia y ispeturia, dé n contribut de gran valüta por l’educaziun y le svilup dla scora dles valades de Badia y de Gherdëna“.
Romi Crazzolara á metü man so percurs profescional al intern dl sistem scolastich tl 1974 sciöche maestra tla scora elementara da Urtijëi. Do cinch agn d’insegnamënt tla scora elementara éra passada ala scora mesana da Urtijëi. Dal 1985 al 2001 é Crazzolara stada direturia didatica dles scores elementares dla Val Badia. Dal 2001 al 2009 ára spo surantut la direziun raionala dles scores elemetares y mesanes de Al Plan de Mareo. Ispeturia dles scores ladines éra stada dal 2009 incá. La funziun dl'ispeturia dles scores é chëra da sostigní le sistem formatif por ci che reverda chestiuns pedagogiches y de ordinamënt y da ciaré do dl bun funzionamënt dles ativités didatiches sön inciaria dl’Intendënt.
Cun i 31 d’agost vá l’ispeturia en ponsiun y é insciö gnüda saludada da püch cun na picia festa de rengraziamënt cun les mius aodanzes por le scomenciamënt de na perioda de vita nöia. La direziun dl Ispetorat dles scores ladines gnará surantuta dal 1 de setëmber inant da Albert Videsott, diretur atual dl zënter dles scores altes da La Ila.
rc
