Reconoscimënt dl’abilitaziun europeica por l’insegnamënt de lingaz todësch
Cun l’aprovaziun dla reforma dla scora statala ti á le Parlamënt surandé la competënza ala Provinzia de Balsan da reconësce les abilitaziuns da insigné por todësch stlütes jö te d’atri Stac dl’Uniun europeica. Chësta prozedöra valará ma por i maestri che á l’intenziun da adoré l’abilitaziun a livel provinzial.
Sön la basa de na norma contignüda tla reforma dla scora dal inom „La buona scuola“ sarál poscibl te n valgönes edemes da ciafé le reconoscimënt tl Südtirol dles abilitaziuns dl insegnamënt dl lingaz todësch stlütes jö te un di Paisc dl’Uniun europeica. Le medemo reconoscimënt reverda ince les materies insegnades por todësch tles scores dles localités ladines.
Cina sëgn messâ la prozedöra de reconoscimënt dl’abilitaziun dl insegnamënt tl lingaz todësch gní aprovada diretamënter da pert dl Minister por l’istruziun y porchël jêl debojëgn da traslaté döta la documentaziun tl talian cun na seria de cosć implü por i maestri interessá, chësta prozedöra podará da sëgn inant, por merit de na norma ajuntada tla reforma aprovada, gní fata diretamënter dai ofizi provinziai competënc.
Por le momënt vëgnel ciamó definí plü avisa le percurs de reconescimënt da pert dles Intendënzes ladina y todëscia y insciö él da ti aconsié ai maestri interessá da aspeté ciamó cina la contlujiun de chësc prozes che dorará ciamó n valgönes edemes. I maestri che ó ciafé le reconoscimënt dl’abilitaziun a livel nazional messará fá domanda, sciöche denant, al Minister competënt.rc
