Museum Ladin: Vijites acompagnades debann por talian a trëi mostres
En vëndres ai 4 de setëmber organisëia le Museum Ladin Ciastel de Tor na vijita acompagnada debann dla mostra tematica „1914-1918. Al de là vigni confin. I Ladins conta sua storia“. Al gnará ince a se le dé na vijita acompagnada – tres debann – dles staziuns dl proiet artistich SMACH y ala mostra d’ert tl Istitut Ladin Micurá de Rü. Les vijites sará por talian.
Por düc chi che ó colié na spazirada alaleria cun n aprofondimënt cultural y artistich mët le Museum Ladin „Ciastel de Tor“ da San Martin a desposiziun, en colaboraziun cun le proiet Land Art SMACH (San Martin Art Culture and History) y cun l’Istitut Ladin Micurá de Rü de plü vijites acompagnades ai 4 de setëmber debann y por talian.
La pröma poscibilité vëgn a se le dé dales 10 cun na vijita acompagnada ala mostra nöia „1914-1918. Al de là vigni confin. I Ladins conta sua storia“ che tematisëia la perioda dla Gran Vera en relaziun cun la popolaziun dles valades ladines y spliga sciöche les condiziuns de vita y de scombatimënt sön le frunt dolomitich ê. La mostra sará ciamó da odëi cina ai 26 de jügn dl 2016.
Do la vijita acompagnada ala mostra tl Museum Ladin jará le de inant tl zënter dl paisc de San Martin de Tor, olache an podará vijité n valgönes operes artistiches dl proiet SMACH. Al se trata de na mostra alaleria tles Dolomites cun 10 istalaziuns te posć d’interes cultural y storich dl Comun de San Martin de Tor. Ala fin dl evënt gnarál vijité la mostra d’ert dl Istitut Ladin Micurá de Rü metüda da jí adöm al EPL (Ert por i Ladins).
Plü informaziuns pón ciafé tres la plata internet dl Museum Ladin sot a www.museumladin.i, na panormaica sön düc i atri museums dl Südtirol él poscibl da ciafé sot a www.musei-altoadige.it.rc
