De dl’Autonomia: Portes davertes, conferënza y premiaziun di maturanc
En ocajiun dl De dl’Autonomia en sabeda ai 5 de setëmber deura le Consëi provinzial y l’Aministraziun provinziala por le secundo iade sües portes. La tematica prinzipla dl de sará la familia. Dlungia les ativités desvalies che an pó vijité ti palac provinziai vëgnel ince metü da jí n convëgn sön „l’autonomia y la resistënza“ y na premiaziun di maturanc plü lezitënc dl Südtirol.
Le presidënt dla Provinzia Arno Kompatscher, l’assessuria Waltraud Deeg, le presidënt dl Consëi provinzial Thomas Widmann y so vize Roberto Bizzo á presenté incö tl salf stampa dl palaz provinzial le program dl De dl’Autonomia 2015. „Bele da agn festejëia la Junta provinziala ai 5 de setëmber le De dl’Autonomia por recordé la sotescriziun dl tratat Gruber-Degasperi che é la fondamënta iuridica prinzipala de nosta autonomia südtiroleja“, á splighé le presidënt dla Provinzia Arno Kompatscher. „Le de dla porta daverta sará insciö n’ocajiun por düc i zitadins da imparé da conësce diretamënter söl post sciöche al vëgn aprové y fat leges y sciöche al funzionëia l’aministraziun publica“, insciö Kompatscher inant. Sön la plaza Silvius Magnago y ti frabicac tla vijinanza gnarál organisé n program desvalí cun tröpes ativités de aorela cörta por ti dé ai zitadins la poscibilité da descurí le funzionamënt dl’aministraziun provinziala y dl Consëi provinzial.
La tematica zentrala dl De dla Porta daverta 2015 sará la familia. „Deache la data de ai 5 de setëmber toma chësc ann sön na sabeda orunsé zelebré le De dla porta daverta sciöche na festa dles families, cun informaziuns y ativités por dötes les generaziuns“, insciö Deeg. „Le focus dl de reverda insciö prinzipalmënter i sorvisc che vëgn metüs a desposiziun dala Provinzia por les families. Danterater presentará l’Agenzia dles families dla Provinzia sü proiec y sües ativités por le pröm iade a n publich plü ampl tla curt dl Palaz Widmann.“
La pert ofiziala dl de gnará tignida sön la plaza Silvius Magnago. Do les parores de salüt dl presidënt dla Provinzia Kompatscher y de so vize Bizzo dales 16.30 gnarál premié i maturanc dl Südtirol che á arjunt le majer numer punc incër les 17.00. Dla musiga dal ví se cruziará la band „Oyster“, implü gnarál a se le dé na slackline show dl SSV Brixen da Porsenú, an podará se fá fá autografs dai atlec südtirolej, descurí le sistem dl tëmp dla Provinzia y les mascinns di stödafüch profescionisć de Balsan.
Tres ai 5 de setëmber gnarál ince organisé n convëgn a Ciastel Tirol che ará le focus sön la storia dla Provinzia. I esperc de storia Elfriede Perathoner, Stefan Lechner y Carlo Romeo analisará te sü referac le movimënt de resistënza dl Südtirol tratan la Secunda Vera Mondiala y süa importanza tratan le svilup dl’autonomia.
La Provinzia Autonoma de Balsan tol ince l’ocajiun ai 5 de setëmber dl 2015, tl cheder dl De dla porta daverta, da organisé le De dla trasparënza y inviëia dötes les porsones interessades a tó pert. Informaziuns plü monüdes pón ciafé sön la plata internet: http://www.provinzia.bz.it/de-autonomia/index.html
Contignüs video y audio:
Video de presentaziun dla scomenciadia dl De dla Porta daverta: http://we.tl/PtXNQHF4BQ
Intervista video cun le presidënt Arno Kompatscher: http://we.tl/WcaTRFIj7D
Intervista video cun l'assessuria provinziala Waltraud Deeg: http://we.tl/qupZH6NJvR
Intervista video cun le presidënt dl Consëi provinzial Thomas Widmann: http://we.tl/AwuXIxI3hT
Intervistes audio cun Kompatscher, Deeg; Widmann y Bizzo http://we.tl/ImQPqN1cHi
rc
Galaria dales fotografies
