Migranc da inier y incö: conferënza stampa al Museum Ladin ai 04.09
La tematica di migranc sciöche sfidada atuala mo ince sciöche n avenimënt dl tëmp passé, che á atoché diretamënter ince la realté dles valades ladines dan da n secul, sará tl zënter de na conferënza por talian cun l’espert Leonhard Voltmer tla sënta dl Museum Ladin a San Martin de Tor en vëndres, ai 4 de setëmber dales 20.30. L’entrada é debann.
Tl contest dla mostra tematica „1914-1918. Al de là de vigni confin. I Ladins conta sua storia“ gnarál tigní en vëndres ai 04 de setëmber dales 20.30 tla sënta dl Museum Ladin Ciastel de Tor a San Martin na conferënza dal titul „I migranc da inier y i migranc da incö“. L’espert dl setur Leonhard Voltmer, consulënt por i profugs dla Caritas dla diozeja da Balsan, analisará insciö les condiziuns dla popolaziun dles valades ladines tratan la perioda dla Gran Vera en confrunt ince dla situaziun atuala t'Europa. La conferënza gnará tignida por talian, l’entrada é debann.
Por plü informaziuns prëibel vijité la plata internet dl Museum Ladin Ciastel de Tor, strada Tor 65, San Martin, tel. 0474 524020, http://www.museumladin.it/
rc
