Un n miliun implü por l’assunziun de personal dër cualifiché
La Junta provinziala á tut la dezijiun da aprové un n miliun de euro implü por l’assunziun y la metüda a desposiziun de personal dër cualifiché tles impreses dl Südtirol. Do da n ann é le pröm bilanz dl proiet scomencé dala Provinzia positif: la pröma dotaziun de 1,6 miliuns de euro é bele gnüda adorada sö por ti garantí l’ocupaziun a 30 porsones dër cualificades te 27 imprejes.
Ala fin de agost dl 2014 â la Junta provinziala aprové na metoda de sostëgn nöia: sce n'impresa tól sö personal dër cualifiché spo ciafara n aiüt finanziar ti pröms dui agn che cür le 50 porcënt di cosć dl personal. Le pröm bilanz do da n ann pó se lascé odëi: la pröma dotaziun metüda a desposiziun dala Junta de 1,6 miliuns de euro é bele gnüda adorada sö por ti garantí l’ocupaziun a 30 porsones dër cualificades te 27 imprejes. Implü él ciamó vint domades che aspeta da gní ejaminades.
Por chësc á la Junta provinziala tut la dezijiun incö al pröm de setëmber da aumenté le sostëgn finanziar cun ressurses ajuntives por un n miliun de euro. L’obietif prinzipal dla bandida dla Provinzia é chël da ti dé na sbürla al'assunziun o ala metüda a desposiziun de personal dër cualifiché por aumenté le livel de cualificaziun dl personal che se crüzia di prozesc d’invoaziun dles imprejes, da aumenté i resultac dles impreses tl setur dl’archirida y dl svilup y da favorí l’ocupaziun y la competitivité. Le sostëgn reverda ma la creaziun de posć de laur nüs y nia de la surantuta de posć bele esistënc. „Dantadöt él nosta priorité chëra da investí te porsones jones dër cualificades che á insciö dër na buna rajiun por ne lascé nia le Südtirol“, á recordé le presidënt Arno Kompatscher do la sentada dla Junta.
Cina sëgn él sté meso, tres chësta forma de sostëgn, da ti dé n post de laur a tëmp indeterminé a 20 porsones y a tëmp determiné (por indöt 168 mëisc) a nü porsones. Al se trata, danterater, de 17 injiniers, 5 laureá te materies scientifiches, 4 esperc d'informatica, 2 biologs y 2 architëc. Les ëres é indöt 10. Chësta mosöra de sostëgn ti é insciö jüda a bëgn a 27 impreses dl Südtirol che é atives ti seturs agroalimetar, bëgnester y sanité, frabiché, energia y ambiënt, tecnologia y informatica.
rc
