Dala Junta: Scomenciamënt dles tratatives por mioré le sorvisc dla posta
Ares metará man en jöbia ai 03/09 a Roma les tratatives danter la Provinzia y l’aziënda Poste Italiane por la reorganisaziun dl sorvisc dla posta tl Südtirol. „L’obietif – insciö á splighé le presidënt Kompatscher – é chël da surantó plü competënzes che dess gní finanziades tres le pachet di 100 miliuns al’ann preodü dal’Acordanza de Milan.“
La stlüta di ofizi dla posta a Laives á indô porté tl zënter dl’atualité la chestiun dla reorganisaziun dl sorvisc dla posta tl Südtirol. N argomënt che vëgn ince conscidré dala Junta provinziala de priorité cun le presidënt Kompatscher che jará a Roma en jöbia ai 3 de setëmber por scomencé les tratatives cun i suranstanc statai dl’aziënda Poste Italiane. „Sciöche Junta provinziala ne sarál nia ma nosc obietif chël da sostigní les ghiranzes y i concursc di comuns cuntra la stlüta di ofizi dla posta, mo i orun ince rové a n'acordanza de mioramënt dla cualité dl sorvisc te nosc raiun“, insciö Kompatscher.
La fondamënta iuridica dles tratatives é l’Acordanza de Milan, che prevëiga che la Provinzia contribuëscess al ressanamënt dl defizit dl Stat cun 100 miliuns de euro al ann. Chësc impëgn pó ince gní mantigní tres na surantuta de competënzes y deleghes statales, les spëises che reverda le sorvisc dla posta vëgn aratades de 20 miliuns de euro al’ann. „La surantuta de chëstes spëises ne portass para degun pëis finanziar sön le bilanz provinzial y podess gní inserida tl pachet di 100 miliuns de euro dl’acordanza de Milan. Sciöche condiziun dla surantuta de chëstes competënzes messará l'aziënda archité so prozes de sparagn.“ Le presidënt Kompatscher á sotligné che l’obietif dles tratatives, tratan chëres che al gnará ince ejaminé i orars de daurida y i sorvisc ajuntifs dla Provinzia, é „chël da orëi ti pité ai zitadins y ales impreses n sorvisc dla posta cun na cualité plü alta.“
rc
