Premiaziun di maturanc y aodanzes por le scomenciamënt dl ann de scora nü
Le presidënt dla Provinzia Kompatscher y i assessurs Mussner, Tommasini y Achammer á premié incö (ai 5 de setëmber) tl contest dl De dl’Autonomia i mius maturanc dl ann de scora 2014/15. Te chësta l’ocajiun ti fej la Junta provinziala ince les mius aodanzes a düc i scolars che metará man en lönesc ai 7 de setëmber l’ann de scora nü.
L’assessur por la scora ladina Florian Mussner ti á ince fat a düc i maturanc i complimënc por chësc resultat d’ezelënza: „I sun sigü che i maturanc á les mius condiziuns por mët man n percurs academich o de laur nü y che ai á ponü les fondamëntes por dé so contribut ince por nosta Provinzia ti dagní. I ëis desmostré da avëi stlüt jö cun gran competënza y dediziun na tapa dër importanta de osta vita.“
L’assessur por la scora taliana Christian Tommasini ti á recordé ai studënc presënc che la dezijiun che ti speta sëgn sön le dagní profescional ne sará nia ma na dezijiun che ará n’influënza fondamentala sön le percurs de vita mo ince sön le svilup dla sozieté südtiroleja, insciö Tommasini.
„L’arjunta de cënt punc pro l’ejame de maduranza é la conseguënza de n laur costant, de tröpa lezitënza y dediziun“, sotlignëia l’assessur por la scora todëscia Philipp Achammer. „Datrai ól ince ester n pü de fortüna por ajunje le mascimo di punc, mo sce i sëis incö chiló sciöche i mius dla Provinzia spo é chësc n resultat che ëis arjunt cun fistidi, talënt y vëia da imparé,“ insciö Achammer.
La premiaziun di maturanc plü lezitënc é gnüda fata dal presidënt Kompatscher che ti á ince surandé a vignun na scincunda. Ala festa de premiaziun ál ince tut pert i intendënc Roland Verra, Peter Höllrigl y l’intendënta Nicoletta Minnei.
Scomenciamënt dl ann scolastich nü 2015/16
Sce da öna na pert pól gní festejé la contlujiun de n capitul important, mëtel por tröc scolars y mituns dla scolina en lönesc ai 7 de setëmber man l’ann de scora nü 2015/16. L’inaudaziun ofiziala dl ann de scora é gnü a se le dé bele en jöbia ai 3 de setëmber cun le De dla Scora ladina a chël che al á tut pert i de plü suranstanc dl sistem scolastich ladin, i maestri y rapresentanc di geniturs. L’assessur por la scora ladina Florian Mussner á recordé tratan l’inauguraziun i 40 agn dla nasciüda dl’Intendënza ladina y á sotligné l’importanza dl rode dla por le svilup dla sozieté „nia ma sciöche fontana dl savëi, mo ince de valurs y de vita sciöche la solidarieté, la comunanza y le dialogh“, insciö Mussner. Dlungia le mantignimënt di bugn resultac di scolars dles scores ladines sará por l’assessur öna dles sfidades dl dagní por le personal insegnant l’integraziun de scolars nüs y cun bojëgns speziai, olache vignun dess dé so contribut. Dötadöm él scrit ite tles scores dles valades ladines indöt 2.511 scolars y scolares, de chisc 1242 tles scores elementares, 733 tles scores mesanes y 536 tles scores altes. Tles scores todësces él scrit ite indöt 58.829 scolars, te chëres talianes 16.699.
L’assessur por la scora taliana Christian Tommasini á recordé por l’ocajiun che „nosc sistem scolastich é na carateristica particolara dla Provinzia y che lauran düc adöm sarál ciamó poscibl dal mioré. L’assessur por la scora todëscia Philipp Achammer sotlignëia che le bun funzionamënt dles scores tl Südtirol é dantadöt n mirit dl’engajement di insegnac che á dër na buna preparaziun y dla gran azetanza dla formaziun ince da pert dla sozieté.
Düc trëi i assessurs á recordé che öna dles sfidades prinzipales dl proscim ann de scora sará l’adatamënt di trëi sistems scolastics ala reforma statala dla „buona scuola“. A düc i scolars, maestri, insegnanc, direturs y colaboradus che laora te scora ti fej i assessurs Mussner, Achammer y Tommasini les mius aodanzes por l’ann de scora nü 2015/16.
rc
