Scores ladines: Aproades les diretives por les ativités extrascolastiches
Sön proposta dl assessur Florian Mussner á la Junta provinziala aprové da püch le reconoscimënt dles ativités de formaziun extrascolastiches da pert dles scores ladines. Cun la lege omnibus gnará les diretives nöies aplicades por le pröm iade en chësc ann de scora 2015/16. „L’integraziun de ativités extrascolastiches é n arichimënt dl’oferta formativa por nostes scores", insciö Mussner.
Tl mëis de jená dl 2015 á le Consëi provinzial aprové la lege omnibus nöia sön l’istruziun scolastica, che prevëiga ince por les scores elementares, mesanes y altes dles valades ladines le reconoscimënt de ofertes formatives extrascolastiches, sciöche por ejëmpl tres l'insegnamënt dles scores de musiga o tres la frecuentaziun de ativités sportives.
Les diretives prezises, che les scores messará adoré pro le reconoscimënt, é gnüdes aprovades da püch da pert dla Junta provinziala sön proposta dl assessur por la scora ladina Florian Mussner. „La congruënza danter l’ativité extrascolastica y le fin formatif, la profescionalité dles uniuns che pita i sorvisc y i standarg de cualité sará i critérs prinzipai dl’azetaziun dles ativités extrascolastiches“, spliga l’assessur Florian Mussner. Cun le reconoscimënt dl’oferta extrascolastica vëgnel renforzé le lian danter les scores y i partners dl’educaziun y insciö pól ince gní alisiré l’orar di scolars te na manira regolamentada, insciö l’assessur.
Les scores dles valades ladines ára la poscibilité da chirí fora autonomamënter la cuantité avisa dles ores a desposiziun por ativités extrascolastiches, sciöche ince i critérs de cualité dles ofertes, les ativités extrascolastiches da reconësce y i organisadus dles ofertés. Por les scores elementares y mesanes pól gní conzedü na perioda dles ativités mascimala de 34 ores al ann, por les scores altes él preodü mascimo 57 ores al ann. Les ativités extrascolastiches ne gnará nia valutades cun na nota, mo ares á valüta por le reconoscimënt dl ann scolastich complessif.
rc
