De dl’Autonomia y dles portes davertes, bilanz positif
2mile porsones á tut pert al De dles portes davertes a Balsan y a Ciastel Tirol olache al é gnü pité n'odüda atuala sön l’analisa storica dl raport danter la resistënza y le nazifascism y le svilup dla realté particolara südtiroleja. Le bilanz dl De dl’autonomia, festejé ai 5 de setëmber, é positif y por le proscim ann él preodü l’aniversar di 70 agn dal’Acordanza de Paris.
„Al é na nosta oblianza da tigní a mënt les tapes plü importantes che á porté a nosta autonomia d’aldedaincö – á comenté le presidënt dla Provinzia Arno Kompatscher – da öna na pert recordan l’Acordanza Gruber-De Gasperi che é la fondamënta por la validité internazionala dl’autonomia, y dal’atra pert sotlignan l’impëgn y l’idealism de düc chi che á defenü i valurs dla democrazia, dla liberté y dla pesc tla perioda dl nazifascim, paian gonot n prisc dër alt.“ Le convëgn a Ciastel Tirol cun les analises storiches da pert di esperc Elfriede Perathoner, Carlo Romeo y Stefan Lechner ti á dé na visibilité nöia ala fasa storica dal 1918 inant cun tröpes contradiziuns che á caraterisé le svilup dla storia südtiroleja. Tratan le convëgn él ince gnü valorisé da pert dl suranstant dla Provinzia Kompatscher i sforc de düc chi che á fat resistënza, tratan la perioda dla secunda vera mondiala, cuntra les ditatöres.
„I ún ciafé n gran consens da pert di partezipanc y dantadöt dai ombolc, por la tematica che i ún chirí fora. Sce i viun aldedaincö te na sozieté democratica caraterisada da na convivënza pazifica é chësc dantadöt n mirit de chi che é jüs cuntra ales formes de populism y nazism: de chësc coraje ne dessun mai nes desmentié y le recordé por le dagní“, insciö Kompatscher. Le „dagní“ é ince gnü festejé te na manira particolara a Balsan, tla curt interna dl Palaz provinzial, cun la premiaziun di 112 mius maturanc dl Südtirol, „che rapresentëia nosc dagní“, insciö Kompatscher.
Ince la secunda ediziun dl De dl’autonomia é stada n suzes cun tröc sorvisc y portines cun informaziuns por i zitadins, vijites acompagnades, n program de scomenciadies ampl cun ativités che á trasformé por un n de la plaza Silvius Magnago te na fiera alaleria. Dötadöm á söporjö 2mile porsones tut pert ala manifestaziun y che á orü s’informé sön le funzionamënt dl'aministraziun provinziala che manajëia l’autonomia y che se crüzia de so svilup. „L’autonomia é de düc nos – á stlüt jö le presidënt Kompatscher – y sües sëntes ne dess nia ester i palac dl podëi, mo les ciases de düc i zitadins y les zitadines a chëres che ál ti stá a cör le dagní de chësta tera.“
rc
