Eghes pazes: tarifes nöies por la sarenaziun y depuraziun
I Comuns dl Südtirol ará tl dagní plü autonomia y opziuns de gestiun plü amples canche ara nen jará dles tarifes varëntes por i sorvisc de sarenaziun y depuraziun dles eghes pazes. Les diretives aproades incö ai 8 de setëmber dala Junta provinziala prevëiga danterater n sistem de na cuta fissa anuala o de n paiamënt colié a vigni depuraziun efetuada.
„Cun chësc sistem nü – sotlignëia le presidënt dla Provinzia Kompatscher y l’assessur competënt Richard Theiner – ti jún adincuntra ales ghiranzes de tröc comuns, che da tëmp se damana tarifes manco stares, plü trasparëntes, coliades ales prestaziuns y orientades ales esigënzes di consumadus finai.“ Chësc ó dí concretamënter che por les eghes pazes de ciasa o industriales pó i cosć di sorvisc de depuraziun y de sarenaziun gní calcolá aladô de döes formules.
La pröam formula resta chëra tradizionala cun na letöra anuala di aparac de calcolaziun, o – y chësta é la novité – adoran na tarifa por vigni depuraziun efetuada. Chësta proposta é gnüda laurada fora dai esperc dl’Agenzia provinziala por l’ambiënt y prevëiga le respet de plü condiziuns, danterater: la contüda dl implant, i cosć fisc, la cuta variabla di cosć y le coefiziënt colié ai metri cubi desciariá. Cun la deliberaziun aproada incö (ai 8 de setëmber) dala Junta provinziala jará le sistem de calcolaziun nü dles tarifes en funziun ciamo chësc ann tl 2015.
rc
