Dala Junta: Barat de arees militares, acordanza por raiuns nüs
Tres l’acordanza danter le Stat y la Provinzia gnarál scomencé en jöbia cun la costruziun de trëi frabicac a Maran che ti fajará da alberch ales families di soldas en sorvisc tl Südtirol. Implü prevëiga l’acordanza la surandada di raiuns nia plü adorá dal Minister dla Defenüda ala Provinzia. Al é preodü plü intervënc a Balsan, Porsenù, Corvara, Sterzing, Laives, Vahrn y Kaltern.
Tres na seria de acordanzes á la Provinzia stabilí cun le Minister dla Defenüda n program che reverda le barat de abitaziuns por militars por arees che ne vëgn nia plü adorades dai militars, „n’acordanza inovativa – á sotligné le presidënt dla Provinzia Arno Kompatscher – che da öna na pert ciafa na soluziun ales esigënzes de abitaziuns di militars en sorvisc tl Südtirol y che dal’atra pert tól ite raiuns nüs dër preziusc por la Provinzia y i Comuns.“ Concretamënter se cruziará la Provinzia dla costruziun de abitaziuns por i militars y sües families al’intern dles casermes, adatan les infrastrotöres nezesciares y sciöche barat ciafa la Provinzia zoruch arees dl medemo valur che le Minister dla Defenüda ne adora nia plü. Les acordanzes sotescrites prevëiga la realisaziun de laurs por indöt 200 miliuns de euro, la costruziun de 400 abitaziuns cun na capiënza de 3.800 posć da dormí y le passaje ala Provinzia de 70 hectars de terac. „Al se trata de zones che é da ciafé al’intern de localités – á ajunté Kompatscher – y insciö de importanza fondamentala por efetué investimënc sön proiec de interés publich. Chësc ne porta nia ma para vantaji por la politica urbanistica, mo ince por döta l’economia locala, cun na seria de vantaji por le setur dl frabiché, che é tres ciamó te na situaziun delicada.“
N vare important dl’acordanza danter Provinzia y Stat sará le scomenciamënt en jöbia ai 10 de setëmber a Maran di laurs de costruziun de trëi frabicac tla zona dla caserma „Battisti“. Implü gnarál sotescrit la secunda mudaziun dl’acordanza dl 2008 cun le Minister dla Defenüda y dl’Agenzia dl demane. La Junta provinziala á insciö aprové incö ai 8 de setëmber na deliberaziun che autorisëia le presidënt dla Provinzia Kompatscher da firmé l’acordanza che prevëiga le trasferimënt de terac te plü zones tl Südtirol. Insciö él preodü a Corvara laurs de demoliziun y de recostruziun dla caserma „Tempesti“. A Balsan, Laives y a Porsenú gnarál ressané y, en pert fat sö danü, na seria de abitaziuns por i soldas. L’acordanza prevëiga implü la cumpra da pert dla Provinzia dl areal „Pontile“ a Kaltern, de na pert dla caserma „Menini di Caroli“ a Sterzing y dl ciamp dl sport dla caserma „Verdone“ a Vahrn.
rc
