Dala Junta: mioré la gestiun dl’Euregio, smendrí la burocrazia
Deplü Euregio, demanco burocrazia: chësc le messaje prinzipal dla deliberaziun tecnica aproada incö (ai 8 de setëmber) dala Junta provinziala che á l’obietif da mioré la gestiun dl’organisaziun dl GECT Tirol-Südtirol-Trentin. La delibera é gnüda aprovada dan da püch dala junta dl Land Tirol y aspeta sëgn ma plü la löm vërda da pert dl esecutif da Trënt.
„La cooperaziun sura i confins fora danter le Tirol, le Südtirol y le Trentin – á sotligné le presidënt dla Provinzia Arno Kompatscher – á l’obietif prinzipal da atué mosöres concretes tl contest europeich che caraterisëia chisc trëi raiuns. Al ne se trata nia ma da renforzé le lian danter i trëi raiuns, mo ince da lauré adöm por ciafé respostes deboriada a tröpes chestiuns che reverda por l’ejëmpl l’ambiënt, la mobilité, la cultura y les politiches soziales. Por aumenté l’efiziënza él nezesciar da smendrí la burocrazia y da evité laurs dopli.“
Propi chësta é la direziun dla delibera aproada incö (ai 8 de setëmber) dala Junta provinziala dl Südtirol, che ti pormetará ala Provinzia n’atuaziun aministrativa plü asvelta dles dezijiuns dla Junta y dl plenum dl’Euregio. „Chësc porta para – insciö á splighé le presidënt Kompatscher - che vigni presidënt nominará na porsona che se fistidiará dles chestiuns dl’Euregio cun la priorité da lauré sön l’atuaziun dles dezijiuns stabilides. Implü gnarál a se le dé n’incuntada al ann di assessurs di trëi raiuns cun les medemes competënzes por inrescí le livel d’atuaziun di proiec dl’Euregio y por fá propostes por scomenciadies nöies.“
rc
