Segurazion dla streda statela sun Plan de Gralba
Chëst’ena che vën scumencerà i ntervënc d’adatamënt y de segurëza dla streda statela te Gherdëina te de plu lueges tl chemun de Sëlva. Inier, n lunesc, ai 7 de setëmber, iel unit sëurandat la ncëria di lëures.
L’Assoziazion temporera de mprejes ATI, metuda adum dala firmes Goller Bögl srl de Persenon y Geobau srl de Bulsan, à giapà assenià i lëures d’adatamënt y de segurëza dla streda statela de Gherdëina te ponc defrënc dl chemun de Sëlva.
La stipulazion dl cuntrat curespundënta ie unida fata inier, n lunesc, ai 7 de setëmber 2015, per na soma de 2,4 milions d’euro, stlutes ite la spëises per la segurëza. L scumenciamënt di lëures ie udù danora per i 14 de setëmber 2015; chisc durerà, coche l ie preudù, 384 dis.
Pra i lëures se tratel, tlarësc l injenier Maurizio Mazagg, diretëur dl Ufize tecnich stredes zënter-sud dla Repartizion Nfrastrutures dla Provinzia, de lëures d’atatamënt y de segurëza di trac de streda nteressei dla sezion traversela dla streda tres chëi che l puderà unì miurà l flus dl trafich cun l perfeziunamënt dla trassa y l slargiamënt dla corsies.
Danter i ntervënc plu mpurtanc iel l slargiamënt dla raida pra l luech da Merch, che gauja tl mumënt for n pericul tl cajo che l vën ancontra na curiera; la curieres defati, ruva, per fé la raida, tla pert dla streda di auti che ti vën ancontra.
I trac de streda sibe a mont che a val unirà stabilisei ntan i lëures cun parëies nbrucei, dadedò uniral fat su mures de sustëni cun micropei y ancorajes permanënc.
I lëures sun streda unirà dejëuc ntan i mënsc da d’ansciuda y da d’autonn, n pert unirà la streda stluta cun l transit dl trafich a sëns unich auternà. I ntervënc unirà purtei inant nce ntan la sajon turistica da d’instà, ma mé sun la sperses dlongia streda.
USP
Galaria dales fotografies
