Museum Natöra: mostra „Lëdi y salvari“ da odëi cina la fin de jená
Ciamó cina ai 13 de setëmber y spo dai 3 de otober cina la fin de jená dl 2016 sarál poscibl da vijité tl Museum Natöra da Balsan la mostra speziala „Lëdi y salvari“. Da odëi él de plü retrac de spostamënc de tiers salvari y de coridors naturai dles Alpes y dl’America dl nord che dess sensibilisé sön le spostamënt lëde di tiers y sön le mantignimënt dla biodiversité.
Milesc de caribú, les renes dl’America dl Nord che se mët sön le tru por les spones dl’Alasca olache ares s’archita por l’isté, les alces dla nëi che jora sura l’America dl Nord cuntra le Canada o la Groenlandia y na laurs kermode dla Great Bear Raiforest che prô da pié pësc: chëstes é ma n valgönes dles scenes che le fotograf Florian Schulz á documenté te sü stüdi sön i spostamënc di tiers te passaji naturai ti raiuns dl'America dl Nord. Na pert de sües fotografies á Schulz metü a desposiziun por la mostra speziala „Lëdi y salvari“ dl Museum Natöra Südtirol, che é ciamó da odëi cina en domënia ai 13 de setëmber. Daldô podará la mostra speziala indo gní vijitada dai 3 de otober cina ai 31 de jená dl 2016, tres dales mertesc ala domënia dales 10.00 ales 18.00. L’entrada costa cater euro, en combinaziun cun la vijita al museum cinch euro, la cherta por les families costa ot euro. Por informaziuns plü avisa y prenotaziuns: Museum Natöra Südtirol, tel. 0471 412964 o tel. 0471 412975, web http://www.museonatura.it/.
La sensibilisaziun sön l’importanza dla conservaziun de passaji natuari sciöche habitat de proteziun por families de tiers é un di obietifs dles operes de Florian Schulz. Le coliamënt tres passaji naturai é na forma de mantignimënt dla biodiversité, dlungia la forma oramai tlassica di parcs naturai sciöche raiuns de proteziun dla natöra. Por la migraziun de tiers salvari é insciö la presënza de passaji naturai un di bojëgns por se mëte sön le iade y se mantigní tl tëmp. Le fotograf todësch Florian Schulz é nasciü tl 1975, al laora da passa 20 agn ti Stac Unis d’America sciöche mëmber dl International League of Conservation Photographers (ILCP).
rc
