Telefon di geniturs: 1064 telefonades che reverda eduaziun, scora y fonins
Na fontana d’aconsiamënt importanta por dötes les domandes che reverda l’edcaziun é le Telefon di geniturs. Incö (09.09) él gnü presenté i dac atuai: insciö él gnü registré l’ann passé indöt 1064 telefonades, dantadöt por ci che reverda domandes sön l’educaziun, la scora y la despartiziun di geniturs. Tres de plü domandes vëgn fates en relaziun al’adoranza di fonins da pert di mituns y jogn.
„Le Telefon por i geniturs é na fontana d’aconsiamënt, de orientamënt y de segurëza por i geniturs cun n’oferta ampla y buna da curí dötes les tematiches dl'educaziun“, insciö l’assessuria por les families Waltraud Deeg incö ai 9 de setëmber tratan la presentaziun dles zifres atuales che reverda le Telefon por i geniturs. Le renforzamënt abonora dles families, la promoziun dla compatibilité danter la familia y le laur y le sostëgn finanziar dles families é i trëi pilastri prinzipai dla politica familiara dla Provinzia.
L’ann passé él gnü registré indöt 1064 telefonades, cun l’educaziun sciöche tematica che é gnüda tratada le plü, cun daldô la scora, domandes che reverda la despartiziun de geniturs, problems de pers, droghes, chestiuns iuridiches y violënza. Da segnalé, aladô dl'aconsiadëssa dl telefon di geniturs Christiane Mühlhäusler, é la gran insegurëza guajiada dal mudamënt costant di valurs y dles esigënzes tres plü altes dl’educaziun. „Implü röiél lapró che i geniturs á tres demanco tëmp por i mituns cun tres plü cosses da mëssei fá“, insciö Mühlhäusler. Les chestiuns portades dant dai geniturs, mo ince da neni y educadus é tres plü complicades. Do l’arat di esperc él insciö important da avëi y costruí tresfora n dialogh costant cun i mituns.
Implü él gnü segnalé n’atra tematica, de chëra che i geniturs se crüzia tres deplü y che reverda la relaziun di mituns cun le computer, i fonins, la playstation, la televijiun, yii. Chësc setur é te na trasformaziun costanta, insciö dij le coordinadú Stefan Eikemann che injunta: „Öna dles gran problematiches dl contat virtual tres i aparac eletronics é che i mituns perd la componënta dla relaziun reala o che ai ne la svilupëia nia completamënter.“
La maiú pert di geniturs damana informaziuns y consëis sön na tematica che reverda i mituns (55 porcënt) y spo les mitans (45 porcënt). La porsona che telefonëia le plü é la uma (69 porcënt), al secundo post él le pere (13 porcënt) y daldô neni, colaboradus che laora tl setur dl’educaziun o i mituns y les mitans diretamënter.
Le Telefon por i geniturs vëgn sostigní dal’Agenzia por les families y fej pert dl’oferta de aconsiamënt por l’educaziun y le matrimone. Dala süa fondazun tl ann 2006 él rové ite indöt 8000 telefonades che vëgn tratades te na manira anonima. Le numer é 800892829 y les telefonades é debann.
rc
