Barat arees militares: Acordanza ajuntiva y deponüda dla pröma pera
Le passaje de arees militares ala Provinzia sciöche barat por abitaziuns nöies por i soldas: chësc é le contignü de na convenziun danter le Minister dla Defenüda y la Provinzia de Südtirol stabilida bele dan da ot agn y che vëgn sëgn portada inant cun n'acordanza ajuntiva y la deponüda dla pröma pera por la costruziun de abitaziuns nöies incö ai 10/09 a Maran en presënza dl presidënt Kompatscher.
Le presidënt dla Provinzia Arno Kompatscher á firmé incö, jöbia ai 10 de setëmber, a Maran l’acordanza ajuntiva dla convenziun danter le Militer y la Provinzia che reverda le passaje de arees nia plü adorades ala Provinzia en barat de mosöres de costruziun y ressanamënt de abitaziuns por i soldas en sorvisc tl Südtirol. L’acordanza ajuntiva é gnüda sotescrita dal secreter de stat dl Minister dla Defenüda Gioacchino Alfano y dal diretur dl’Agenzia dl demane Roberto Reggi y prevëiga le trasferimënt de terac te plü zones tl Südtirol. Insciö él preodü a Corvara laurs de demoliziun y de recostruziun dla caserma „Tempesti“. A Balsan, Laives y a Porsenú gnarál ressané y, en pert fat sö danü, na seria de abitaziuns por i soldas. L’acordanza prevëiga implü la cumpra da pert dla Provinzia dl areal „Pontile“ a Kaltern, de na pert dla caserma „Menini di Caroli“ a Sterzing y dl ciamp dl sport dla caserma „Verdone“ a Vahrn.
Le presidënt Kompatscher á definí l’acordanza ajuntiva n „ater vare important dl'atuaziun dla convenziun de barat, che é gnüda sotescrita l’ann 2007 dala Provinzia cun le Minister dla Defenüda.“ La convenziun prevëiga che arees che ne vëgn nia plü adorades dal militer passa de proprieté dla Provinzia y sciöche barat él la Provinzia che ti arjigná ca les abitaziuns ai soldas en sorvisc tl Südtirol. „Mo al ne se trata nia ma de n barat scëmpl, deache le ressanamënt y la costruziun de abitaziuns nöies porta ince para vantaji por les dites dl post“, insciö Kompatscher. Le secreter de Stat Gioacchino Alfano á sotligné l’importanza dl’acordanza, „na revoluziun dl’aministraziun dl patrimone publich y n ejëmpl che vëgn copié sëgn da atres Regiuns dla Talia.“ Le diretur dl’Agenzia dl demane, Roberto Reggi, á definí l’acordanza cun la Provinzia sciöche la dër ambiziosa y ampla.
Le valur complessif dl acordanza é de söporjö 420 miliuns de euro, zirca le mez reverda sides le valur dles arees militares co ince le cost dl ressanamënt y dla costruziun de abitaziuns. Les acordanzes sotescrites prevëiga la costruziun de 400 abitaziuns cun na capiënza de 3.800 posć da dormí y le passaje ala Provinzia de 70 hectars de terac de ot dles 13 casermes y na seria de bëgns imobili.
Do la sotescirziun él ince gnü a se le dé la ponüda dla pröma pera por trëi abitaziuns nöies por 54 families de soldas tl areal dla caserma „Battisti“ a Maran. Al se trata de abitaziuns che tignará cunt di standarg CiasaClima B cun n investimënt de 12 miliuns de euro. Sciöche barat ciafa la Provinzia dal Minister dla Defenüda la caserma „Mercanti“ de Eppan. Adöm al secreter de Stat Alfano, al diretur Reggi, al presidënt Kompatscher y al vizepresidënt Christian Tommasini á ince tut pert ala manifestaziun la comissara de govern Elisabetta Margiacchi, de plü suranstanc dl militer, dl’aministraziun publica y dl Comun da Maran cun a cé l’ombolt Paul Rösch.
Audio intervistes Kompatscher y Alfano
rc
Galaria dales fotografies
Foto USP/jw
