„Scinca vita“: Sëra d’informaziun sön la donaziun d’organs a Badia
Tl contest dla campagna de sensibilisaziun sön la donaziun de organs vëgnel metü da jí ai 15 de setëmber na sëra d’informaziun dales 20.00 a Badia cun l’assessuria Martha Stocker, le primar Marco Pizzinini, le neurologh Gregorio Rungger y le diretur da denant dl raiun sanitar da Bornech Davide Willeit. Tl zënter dl convëgn sarál ince les impresciuns personales de paziënc atocá y de sü familiars.
„La donaziun de organs salva vites“ (Leben retten dank Organspende) é la tematica zentrala dla sëra d’informaziun che vëgn metüda da jí tl contest dla campagna de sensibilisaziun „Spende Leben – Dona vita – Scinca vita“ en jöbia ai 15 de setëmber dales 20.00 tla Ciasa dles uniuns „Jan Batista Runcher“ a Badia. De plü referënc portará dant i aspec desvalies dla donaziun de organs, les chestiuns tliniches y iuridiches y sará a desposiziun por ti respogn a domandes eventuales.
L’assessuria por la sanité Martha Stocker baiará por l’ocajiun dles rajiuns che á porté al’organisaziun de na campagna de sensibilisaziun, le primar por l’anestesia y la terapia intensiva dl ospedal da Bornech Marco Pizzinini spligará l’assistënza di amará tla staziun intensiva, le neurologh Gregorio Rungger analisará la tematica dla costataziun dla mort zerebrala y le diretur da denant dl raiun sanitar da Bornech Davide Willeit ti jará a funz ales chestiuns iuridiches. De plü porsones atocades y sü familiars cuntará de sües esperiënzes personales cun la donaziun de organs. Daldô gnarál metü da jí na discusciun cun la poscibilité da ti fá domandes ai esperc.
rc
