„De europeich dl patrimone“: Vijité na ciasa retica dl V secul dan G.C.
Cinch posć culturai che ne é normalmënter nia daverc al publich pó gní vijitá ai 20 de setëmber en ocajiun dl De europeich dl patrimone. „Chëstes operes storiches nes dá la poscibilité da descurí le tëmp passé, mo ince da ponsé al dagní“, insciö l’assessur por i bëgns culturai Florian Mussner incö (14/09) ala presentaziun dla scomenciadia. Da odëi sarál ince na ciasa retica.
„Co ciarass pa fora nüsc raiuns zënza les pedies dl tëmp passé che á dötaurela n valur artistich, d’artejanat, archeologich, storich y cultural de na valüta inestimabla por nosta sozieté“, á damané l’assessur por i bëgns culturai Florian Mussner incö (14/09) ala presentaziun dles scomenciadies por le De europeich dl patrimone ai 20 de setëmber. L'assessur á ince anuzé l’ocajiun por rengrazié düc i colaboraus che se crüzia dl mantignimënt di bëgns culturai te Südtirol. „Le De europeich dl patrimone é na poscibilité da ti presenté a n publich plü ampl bëgns culturai y storics de gran valur che ne é normalmënter nia azessibli al publich y da colié insciö l’inovaziun cun la tradiziun“, á recordé Mussner che á invié dötes les porsones interessades da tó pert a chësta scomenciadia che pita l’oportunité da vijité cinch staziuns che cunta dla storia dl’artejanat, dl’industria y dl comerz de Südtirol.
„La tematica zentrala dl De europeich por le patrimone, che vëgn organisé chësc ann tl Südtirol por le dejimo iade, mët le focus sön les recordanzes storiches dla tecnica, dl’industria y dl artejanat de nüsc raiuns. Chësta scomenciadia é n contribut important por colié nosta cultura cun le tëmp passé y chël atual“, insciö la direturia dl Ofize Bëgns culturai Waltraud Kofler Engl.
Un di obiec da vijité por l’ocajiun sará na ciasa retica dl V. secul dan Gejú Crist, olache al é gnü ciafé na gran pert dl toch dla ciasa sot tera tl 2002 a Porsenú. „Por gaujia de n medefüch ê la ciasa vardüda jö. Insciö él sté meso da conservé n valgügn reperc dl’epoca ciamó cina aldedaincö, sciöche por ejëmpl na roda de n ciar, de plü bots y cësć de ceramica“, insciö la direturia dl Ofize Bëgns archeologics Catrin Marzoli. „Chësta ciasa retica é n ejëmpl tipich y de gran valüta dla storia da plüdadî de nosta Provinzia“, insciö Marzoli. Les perts originales dla ciasa retica ciafada tl 2002 a Porsenú pó gní vijitades ai 20 de setëmber a Frangart (via Bolzano 59) tl Ofize Bëgns archeologics dales 10.00 ales 17.00.
N’atra staziun dër interessanta da vijité y daverta al publich ma por le De europeich dl patrimone é la Residënza Reinsberg a St.Pauls/Eppan, cun la capela dla Santa Crusc che é gnüda fata sö danter le 1676/77 y che é apëna gnüda restaurada. Daverta al publich sará por l’ocajiun ince la zentrala idrolelettrica de Algund, le tru tematich de „Oskar von Miller“, che cunta dla storia de produziun de energia idroeletrica y la fabrich de produziun de aluminium a Balsan che é gnüda fata sö ti agn 1936/37.
Le De europeich dl patrimone é na scomenciadia culturala dl Consëi europeich y che vëgn sostigní dal’Uniun Europeica. Gnüda a se le dé tl 1984 por le pröm iade tla Francia á la scomenciadia l’obietif da aumenté l’interes dla popolaziun ti bëgns culturai y tl sconanza dl patrimone artistich en general.
rc
