Dala Junta: figöra nöia dl dotur dai tiers stabilí dal’Aziënda zootecnica
Cun le scomenciamënt dl ann 2016 jará en funziun na rëi de suraverda epidemologica veterinara aladô de n sistem nü cun la figöra prinzipala dl doturs dai tiers 'aziendal': la proposta dl assessur Arnold Schuler é gnüda aprovada incö (15 setëmber) dala Junta provinziala.
„Ince tl dagní“, á splighé l’assessur competënt Arnold Schuler, „gnará le sorvisc veterinar garantí 24 ores sön 24 por 365 dis al’ann.“ Le funziun nöia sará tl dagní le dotur dai tiers aziendal che sostiuësc le dotur dai tiers atual tlamé ’convenzioné’ y che – do la contlujiun de n curs d’ajornamënt de 16 ores – laurará sciöche profescionist lëde. Vigni dotur dai tiers podará stabilí i Comuns te chi che al dá la desponibilité da lauré, implü podará l’Aziënda zootecnica se chirí fora i doturs dai tiers aziendai y i baraté fora te vigni momënt, „chësc te n contest de na concorënza y liberalisaziun plü ampla preodüda ince dales normes europeiches“, insciö l’assessur Schuler. „Ince les aziëndes podará se chirí fora le dotur dai tiers plü adaté do na lista de profesconisć che á dötes les competënzes preodüdes“, á injunté l’assessur.
Le sistem nü dl'assistënza veterinara é insciö gnü adaté ales esigënzes dl’Uniun europeica cun na rëi de suraverda veterinara permanënta cun la figöra nöia dl dotur di tiers aziendal. Tla dezijiun tuta dala Junta provinziala incö ai 15 de setëmber él ince gnü integré les desposiziuns dl ënt nazional che regolamentëia le sorvisc veterinar cun l'adatamënt ales esigënzes locales dl Südtirol.
Le Sorvisc veterinar provinzial coordinëia inant zënza mudaziuns la racoiüda dles informaziuns epidemologiches y le control dl funzionamënt dl Sorvisc veterinar provinzial. „Le sistem atual prevëiga na spëisa de indöt zirca 1,16 miliuns de euro al’ann“, á stlüt jö Schuler.
rc
