Dala Junta: Aziënda unica dl’economia, start tl 2016
L’aziënda economica nöia, che mët adöm te na sozieté unica les cater sozietés dla SMG, EOS, TIS y BLS, jará en funziun dal 1 de jená dl 2016 inant. Do mëisc d’analisa y de propostes él gnü stabilí incö (15/09) da pert dla Junta provinziala tres n’acordanza cheder i proscims vari che dess porté ala nasciüda dl’aziënda economica nöia de proprieté dla Provinzia y dla Ciamena dl Comerz.
L’acordanza cheder é gnüda aprovada incö ai 15 de setëmber dla Junta provinziala che á ince inciarié le presidënt Arno Kompatscher da sotescrí le contrat de fujiun. Ince da pert dla Ciamena de Comerz él gnü inciarié le presidënt Michl Ebner da firmé l’acordanza nöia che prevëiga la realisaziun de n’Aziënda speziala unica por l’economia. L’acordanza cheder ne stabilësc nia ma i tëmps de realisaziun dla fujiun, mo definësc ince avisa les modalités de atuaziun: les döes aziëndes de natöra privata BLS y TIS gnará insciö integrades al’intern dla EOS che gnará metüda adöm cun l’atra sozieté publica dla SMG te n’aziënda speziala unica.
„Al se trata de n prozes dër compliché da plü punc d’odüda deache al reverda la fujiun de cater sozietés desfarëntes cun de plü formes iuridiches“, insciö le presidënt Kompatscher. Al messará ciamó gní tut na seria de dezijiuns sides al’intern dles sozietés co ince dala Provinzia adöm cun la Ciamena dl Comerz, insciö Kompatscher. Por le presidënt dla Ciamena de Comerz Michl Ebner porta chësta fujiun para de plü vantaji por l’economia südtiroleja y che „é n vare important por n anuzamënt positif dles sinergies danter les cater sozietés che vëgn metüdes adöm.“
L’acordanza nöia stabilësc ince danü i raporc de proprieté danter la Ciamena de Comerz che rovará al 40 porcënt y la Provinzia che sará possessuria dl 60 porcënt dl capital dl’aziënda nöia. La gestiun dl'aziënda nöia sará tles mans de n Consëi d’Aministraziun cun sis mëmbri che fej pert di seturs dl’economia che á acompagné le percurs dla fujiun. Cater mëmbri gnará nominá sön proposta dla Provinzia y dui sön proposta dla Ciamena de Comerz. Kompatscher y Ebner sotlignëia ala fin l’importanza de chësta operaziun, che „portará ala nasciüda de n’organisaziun sterscia y buna da renforzé le svilup dl’economia südtiroleja ince te n’otica dla sostenibilité.“
rc
