Dala Junta: program de svilup rural, al é gnü chirí fora i teritori Leader
I teritori “Leader” chiris fora dala Provinzia de Balsan tl cheder dl program de svilup rural 2014-2010 finanzié dal’Uniun Europeica é sis. Chësc é gnü fat fora incö, ai 15 de setëmber, dala Junta provinziala y l’assessur competënt Arnold Schuler á alzé fora che “al vëgn rapresenté düc i raiuns dl Südtirol, destenüs fora tl teritore cotan plü da toch co tl passé”.
I sis teritori Leader che ti pó pormez ales prozedöres de sostëgn preodüdes dala UE é chisc: la Val Venosta, les zones de confin, les Alpes dl Sarntal, les Dolomites dla Val d’Isarch, l’Alta Val d’Isarch 2020 y la Val de Puster. “Ara se trata de na scomenciadia de gran importanza por na regiun sciöche le Südtirol – á splighé Arnold Schuler – che pó se lascé sön maius finanziamënc europeics co tl passé: indöt gnarál sostigní proiec tl cheder dl program de svilup rural 2014-2020 por complessivamënter feter 20 miliuns de euro”.
En pratica gnarál metü sö grups de laur ti teritori Leader cun la partezipaziun de istituziuns, aziëndes, asoziaziuns y porsones privates: ai ará l’inciaria da lauré fora idees y propostes sön la basa locala pian ia da scomenciadies che vëgn “dal bas” y che ó trá ite gran pert dla popolaziun. Les Comunités raionales ará te chësc sistem la funziun de organisaziuns zentrales che rovënn y coordinëia les scomenciadies desvalies.
Le program Leader, acronim franzesc de “Liaison entre actions de développement de l'économie rurale" (che an podess tradüje cun “Rëi de aziuns por le svilup rural”) é gnü metü a jí por le pröm iade dl 1991 dala UE y le Südtirol á fat para bele dal scomenciamënt. “Tratan chisc 22 agn – á dit Schuler stlujon jö – á le program Leader partí fora ti posć plü periferics de nosta provinzia apresciapüch 50 miliuns de euro por sostigní le svilup rural”.
OSP
