Dala Junta: degun aumënt por la retüda di Comuns sön le refodam
La Junta provinziala s’á dé jö incö (ai 15 de setëmber) cun la cuantificaziun dles retüdes che ti speta ala Provinzia da pert di Comuns y di gesturs di implanc de racoiüda y dla desgorta dl ciomënt. Sön proposta dl assessur por l’ambiënt Richard Theiner él gnü aprové na delibera che ti vá adincuntra ales esigënzes di Comuns zënza aumenté les retüdes.
Aladô dla lege provinziala 4/2006 mëss i Comuns y i gesturs di implanc de racoiüda y dla desgorta dl ciomënt contribuí ai invetsimënc dla Provinzia te chësc setur. Insciö él d’oblianza le paiamënt anual ala Provinzia de n import por la realisaziun de deponies dl ciomënt y de implanc por la desgorta y le reziclaje dl refodam.
Cun na deliberaziun tl mëis d’otober dl 2014 â la Junta provinziala mudé i critérs d’aplicaziun dl articul che regolamentëia chësta tematica. Chësta mudaziun ê nezesciara porvia che dal 2014 inant vëgnel burjé döt le ciomënt „de ciasa“ y en pert ince refodam spezial tla borjadoia da Balsan y che á porté para a n smendrimënt dles desgortes tles deponies dl ciomënt.
La spartiziun aladô dla regolamentaziun nöia di cosć ess porté para n contribut finanziar maiú da pert di Comuns, „y sce al foss gnü apliché i critérs aprová spo ess la maioranza di Comuns messü paié n contribut dl 30 porcënt plü alt co chël atual“, á splighé l’assessur competënt Richard Theiner. Por chësta gaujia á la Junta provinziala aprové incö ai 15 de setëmber na regolamentaziun nöia concordada cun le Consëi di Comuns.
Sön la basa de chësta regolamentaziun nöia vëgn les somes che i Comuns mëss ti paié ala Provinzia sciöche retüda di investimënc tl setur dl refodam smendrides dl 2 cina al 1,5 porcënt. „Insciö él sté meso da ciafé indô la dërta balanza y da ne suraciarié nia i Comuns cun na spëisa ajuntiva“, á detlaré Theiner. Le contribut che ti speta ala Provinzia da pert di Comuns ne vëgn insciö nia mudé en confrunt al’ann 2015.
rc
