Scores ladines: Proiec de sostëgn por l’intlujiun de mituns migranc
Ma cun competënzes linguistiches adatades pó i mituns y jogn demostré sües capazités te scora y tla sozieté. Le sorvisc por la consulënza pedagogica y l’integraziun dl’Intendënza ladina á metü da jí chësc isté de plü scomenciadies por mituns y mitans cun y zënza n background de migraziun. „Partezipaziun, intlujiun y formaziun é na ghiranza de düc“, insciö l’assessur por la scora Florian Mussner.
„Poscibilités de formaziun adatades y n sostëgn dl’integraziun tla sozieté fej pert di dërc fondamentai dles porsones y é ince por le sistem de formaziun dles scores ladines fins importanc“, sotlignëia l’assessur por la scora ladina Florian Mussner. Insciö él gnü realisé te chësc contest l’ann passé de plü incuntades danter i suranstanc dles scores y le sorvisc de consulënza psicopedadogica y dl’integraziun dl’Intendënza ladina, che se crüzia dla formaziun interculturala y dla promoziun di lingac por svilupé adöm n plann d’aziuns sön de plü liví.
Pro le plann d'aziun toca n „summercamp“, che é gnü organisé chësc isté por le pröm iade te na forma plü ampla. Tratan le proiet él insciö gnü organisé de plü aziuns che é gnüdes sostignides dales scores y scolines y che á albü sciöche obietif la promoziun di lingac y dl’intlujiun. En colaboraziun cun la direziun dles scolines ladines y cun les direziuns raionales él gnü tigní de plü cursc de lingac, te na manira plajora adatada al eté di mituns, tla Val Badia y te Gherdëna por ladin, talian y todësch. Implü él ince gnü organisé de plü ativités che reverda fujines artistiches y teatrales o jüc alaleria che motivëia le svilup dla personalité y la balanza danter ativité fisica y impëgn inteletual. „L’obietif dl summercamp é sté chël da ti pité ai mituns de plü ocajiuns da vire momënc de intlujiun soziala y linguistica deboriada te n contest informal, zënza barieres, mo che é ince orienté ala realté scolastica cun n program didatich“, insciö l’assessur Mussner.
Le summercamp é gnü metü da jí por trëi edemes tratan i mëisc de messé y agost cun dötadöm 100 mituns y mitans cun y zënza n background de migraziun. Ince n curs por imparé le talian por les umes é gnü organisé y che gnará porté inant da d’altonn por merit dla colaboraziun cun le Servisc Furmaziun Gherdëina. „Por sostigní le conzet de intlujiun ne orunse nia ma pité ativités por i scolars mo ince por i geniturs y por i insegnanc cun cursc d’ajornamënt y de acompagnamënt didatich“, spliga Irene Costa y Olimpia Rasom, les colaboradësses che se crüzia dl setur dl'integraziun tl’Intendënza ladina.
Insciö vëgnel ince metü da jí por chësc ann scolastich de plü scomenciadies. Al dess gní realisé na brosciüra d’informaziun nöia por i geniturs cun consëis sön le sistem scolastich ladin, sön le percurs dles iscriziuns y sön i contignüs dl insegnamënt scolastich. La brosciüra d’informaziun dess gní realisada por ladin, talian, todësch, inglesc, spagnol, arabich y urdu.
Implü él ince preodü la realisaziun de na publicaziun sön diretives che reverda l’intlujiun de mituns y scolars, che é impormó da püch tl Südtirol. Chësta brosciüra dess contigní informaziuns importantes sön la perioda d’inserimënt di mituns, sön la metoda dla didatica intlusiva y dl prozes d’aprendimënt di lingac. Danter l’ater él ince preodü ti proscims dui agn n stüde empirich sön le tëmp d’aprendimënt di lingac da pert di mituns migranc por avëi na basa scientifica por la creaziun de material didatich de sostëgn por i insegnanc. Por le personal insegnant él implü ciamó preodü l’istituziun de n helpdesk sciöche fontana de consulënza y informaziun por la chirida y elaboraziun didatica de material de sostëgn.
rc
Galaria dales fotografies
