Streda dl Prëner śareda da ncuei do la 18.00 per pericul de sasc che toma
Pervia dl pericul de sasc che toma ju unirà la streda dl Prëner (SS 12) y l troi dla rodes do l tunel a Blumau śarei da ncuei domesdì, 17 de setëmber, dala 18 nchin bonamënter n mierculdì, 23 de setëmber, per rejons de segurëza per dut l trafich. Ntan chësc tëmp uniral fat sauté l crëp y menà demez l material.
Ti raions a nord dl tunel ulache l manacia de tumé ju sasc (feter n kilometer dala ntreda dl’autostreda Bulsan nord) fovel bele dan n valgun dis tumà de mëndri sasc sun l troi dla rodes y la streda statela. L geologh provinziel Volkmar Mair y si team à perchël fat n sëuraluech sun l custon dlongia la streda dl Prëner. „Permò da n cuntrol plu ala menuda ncuei danmesdì cun n joler iel unit ora che sëura l parëi de crëp ërt iel n 750 metri cubics de material de sas scialdi puech stabil“, dij l geologh Mair.
Do la senteda dla Prutezion Zevila cherdeda adum dala 10.00 cun l vizeambolt dl chemun de Karneid Albin Kofler, l Servisc dla stredes, l Servisc geologich y reprejentant dla sozieteies dl’energia Snam, Selgas y Ecocenter sciche nce esperc d’esplojion iel unit tëut la dezijion de stlù ju la streda dl Prëner y l troi dla rodes da nsnuet, 17 de setëmber, do la 18.00 nchin bonamënter n mierculdì, 23 de setëmber per dut l trafich. „La streda muessa unì śareda, ajache la segurëza de chi che ie sun streda vën dan dut“, sotrissea l vizediretëur dl Servisc dla stredes provinziel Philipp Sicher. L trafich unirà desvià sun l’autostreda A22 y sun la streda provinziela per Steinegg-Gummer. „Ntan che la streda ie śareda uniral fat i lëures de preparazion per fé sauté l crëp, taië lëns y mené demez l material ala zibla“, tlarësc l geologh Mair. Aldò dla cundizions dl tëmp y de coche n ruva inant cun i lëures, dij Sicher, dëssa i lëures de segurazion dl crëp unì fac n lunesc o n merdi a na maniera che la streda sibe dessegur inò transitabla n mierculdì. Te n proscim var dëssel pona unì fat su costruzions de segurazion dl raion dlongia la streda.
USP
