Dala Junta: Abo+, cherta por 20 euro ince ai lerneri cina i 18 agn
20 euro impede co 150 euro: chësc sará le contribut da paié por i lerneri sot ai 18 agn por podëi s’anuzé dl Abo+ le proscim ann scoalstich 2016/17 y che pormët da anuzé por n ann le sorvisc dl trasport publich local. La dezijiun é gnüda tuta incö (22 de setëmber) dala Junta provinziala.
„Cina sëgn él gnü renové indöt 72.900 abonamënc Abo+ por scolars y studënc, chësta é na zifra dër positiva“, á splighé incö, ai 22 de setëmber, l’assessur por la mobilité Florian Mussner do la sentada dla Junta provinziala. Le numer di abonamënc atual é ma de 6.000 unités plü bas co l’ann passé canche al ne gnê nia ciamó gnü damané la tarifa anuala de 20 euro, insciö Mussner. Cina ai 30 de setëmber él ciamó tëmp da renové l’Abo+ y le numer di abonamënc podess ciamó aumenté.
Atualmënter pó düc i mituns y scolars dles scores elementares, mesanes y altes, i studënc a tëmp plëgn dles scores profescionales, sciöche ince i jogn che fej n curs de formaziun a tëmp plëgn tl seturs dl sozial, fá domanda do n Abo+ cun na tarifa anuala de 20 euro. Por studënc dles Universités y dles atres categories, danter chisc ince i lerneri, é le contribut anual por podëi adoré düc i mesi dl trasport publich por n ann de 150 euro. La Junta provinziala á tut la dezijiun incö (22/09) da smendrí la cuota anuala por i lerneri cina i 18 agn da 150 a 20 euro. „Nosc obietif é chël da smendrí le pëis finanziar por i lerneri sot i 18 agn y da sensibilisé chësta categoria da adoré deplü i mesi dl trasport publich“, insciö l’assessur por la mobilité Florian Mussner. La cuota nöia gnará aplicada dal proscim ann scolastich 2016/17, atualmënter él zirca 1.400 lerneri che adora n Südtirol Abo+, 1.100 de chisc á manco co 18 agn.
rc
