Dala Junta: barat di lifc da scagns cun na furnadoia sön la Plose
Por ti dé na sbürla ala Plose sciöche destinaziun turistica á la Plose Ski Spa tut la dezijiun da baraté i dui lifc da scagns cun na furnadoia unica nöia che dess porté sön la Piza Vansuro (Pfannspitze) sura Porsenú. La Junta provinziala á dé n arat positif al proiet che ará n efet positif ince sön la contrada, podará gní adorada por jites y a n mioramënt dl sorvisc dal punt d’odüda economich.
Le proiet da baraté fora i dui lifc da scagns che porta sön la piza Vansuro (Pfannspitze) cun na furnadoia unica ne dess nia ma porté para vantaji por le turism y l’economia dl Comun de Porsenú, mo ince por döt le raiun dla Plose. "Cun l’implant portamunt nü sön la trata complessiva de dui chilometri podarál gní garantí tratan la sajun da d’invern n trasport asvelt di passajiers cun na proteziun tlimatica adatada, mo ince d’isté sará l’implant portamunt n meso de trasport preziuns por les porsones che fej na jita o na roda sön la Plose", insciö l'assessur por la mobilité Florian Mussner che á presenté la proposta de barat. Atualmënter é i dui lifc da scagns ma en funziun tratan la sajiun da d’invern.
Cun la realisaziun de na furnadoia nöia gnarál ince valorisé la fraziun de Eores che sará ince n coliamënt diret cun le raiun dai schi dla Plose. Por merit dl implant portamunt nü podarál ince gní smendrí i cosć cun vantaji ince por le paesaje passan dai dui implanc atuai a un.
"La Junta provinziala á valuté positivamënter le barat di dui lifc da scagns cun na furnadoia nöia sides por ci che reverda le turism, co ince por la contrada y l’economia locala", insciö Mussner. Tla sentada da incö á la Junta insciö tut la dezijiun da sostigní la realisaziun dl implant nü cun le contribut plü alt poscibl, che fej fora le 75 porcënt dla spëisa totala. Ala fin d’agost á le Consëi d’aministraziun dl Plose Ski Spa anulé la deliberaziun de stlüta dl eserzize invernal y confermé l’intenziun da orëi jí inant cun le sorvisc di implanc portamunt sön la Plose ince tratan la sajun da d’invern.
rc
