Dala Junta: EURAC, 450mile euro por cater proiec d’inrescida
Le budget metü a desposiziun dala Provinzia al’Academia Europeica de Balsan (EURAC) por l’ann 2015 é de 450 mila euro. I scioldi gnará dá a cater proiec d’inrescida sön l’ecologia, le telescialdamënt, le plurilinguism y le sparagn energetich.
“La Provinzia de Balsan – á sotrissé le presidënt Arno Kompatscher – sostëgn vigni ann les ativités dl’EURAC cun n budget de basa che é, por le 2015, de zirca 20,5 miliuns de euro. Implü él preodü la poscibilité da ti dé ciamó d’atri fonds liá a cer proiec d’inrescida sön la basa di resultac arjunc y di obietifs fissá”. La deliberaziun é gnüda aprovada incö (29 de setëmber) dala junta provinziala y prevëiga n contribut de feter 450 mila euro.
Danter i proiec finanziá él chël sön la realisaziun tl Parch tecnologich de n laboratore sperimental por la simulaziun dles rëis de telescialdamënt y teledesfridamënt por sostigní le svilup de sistems plü efiziënc.
Por chësc proiet, coordiné dal Istitut por les energies renovables, él gnü damané 230 mila euro y le finanziamënt preodü por la inrescida tl laboratore alaleria dla Val Mazia é de 155 mila euro. L’idea dl Istitut por l’ambiënt alpin mira a trá ite nia ma la comunité scientifica, mo ince chëra agricola, por aprofondí les conescënzes liades al mudamënt climatich tles regiuns da munt.
De mendri stanziamënc por d’atri dui proiec: le pröm, dal titul “A lezione con più lingue” (A leziun cun de plü lingac) olache an ó fá n retrat dla presënza dl plurilinguism tles scores dl Südtirol, aprofondí la perzeziun danter scolars y personal insegnant y svilupé stromënc y materiai adatá. Le secundo proiet se referësc a n proiet pilot por mioré la gestiun energetica dl patrimone imobiliar dla aministraziun publica, ciaran dantadöt ai intervënc de restrotoraziun y ressanamënt di frabicac.
OSP
