Dala Junta: Ecolabel europeich por les aziëndes dl turism
Les aziëndes dl turism dl Südtirol ára la poscibilité da ester portadësses dl logo europeich Ecolabel cun n’atenziun particolara por l’ambiënt: la Junta provinziala á aprové incö (29/09) na convenziun bienala danter l’ISPRA y l’Agenzia por l’ambiënt dla Provinzia, che fajará i controi tles strotöres por ciaré sce i standarg damaná vëgn tignis ite por l’assegnaziun dl logo.
Le logo europeich Ecolabel analisëia la sostenibilité ambientala di sorvisc dla rezeziun turistica y é gnü cherié tl 2003 por sensibilisé les istituziuns turistiches y i ghesć por na sconanza plü sensibla tl vers dl ambiënt. Le comitê Ecolabel-Ecoaudit/ISPRA é l’organisaziun statala de referimënt por la conzesciun dl logo, ara dá ince informaziuns sön i critérs da tigní ite y fej les verifiches nezesciares por controlé sce i standarg vëgn mantignis. Les strotöres turistiches cun le logo Ecolabel messará respeté na seria de critérs ecologics y le martl é insciö na documentaziun importanta por n svilup sostenibl dl turism.
L’ISPRA („Istitut prinzipal por la proteziun y l’archirida ambientala“) á damané do le sostëgn dl’Agenzia provinziala por l’ambiënt por fá les verifiches dles ativités dles aziëndes turistiches (hotels, camping, atres strotöres publiches) tl Südtirol por ti conzed le logo. La Junta provinziala á aprové incö (29 de setëmber) la sotescriziun dla conveziun tres chëra che l’Agenzia provinziala por l’ambiënt ti dará na man al’ISPRA da efetué les verifiches de control por conzed le logo te Südtirol. "Chësta acordanza garantësc da efetué controi plü asvelc y demanco burocrazia por les istituziuns che fej domanda", á sotligné le presidënt Arno Kompatscher. La convenziun ára na dorada de dui agn, l’ISPRA ti paiará ala Provinzia n contribut por vigni vijita d’ispeziun tles strotöres turistiches locales.
L’Ecolabel europeich por i sorvisc dl setur turistich é na garanzia ajuntiva por n svilup sostenibl dles aziëndes turistiches: al gnará zertifiché la cualité ambientala dla strotöra y controlé le consum de ressurses naturales sciöche energia y ega acompagnada da n smendrimënt di cosć de gestiun. Danter i critérs da ademplí por ciafé le logo Ecolabel él gnü inserí: na delimitaziun dl impat ambiental di sorvisc pitá, na delimitaziun dl consum energetich y idrich y dla produziun de refodam, le sostëgn de ressurses renovables y de sostanzes nia prigoroses por l’ambiënt.
rc
