Educaziun religiosa: Presidënt y Vësco firma n’acordanza
N protocol d’acordanza, sotescrit incö (02/10) dal presidënt dla Provinzia Arno Kompatscher y dal vësco Ivo Muser, regolamentëia por le pröm iade te na manira complessiva düc i aspec prinzipai dl’educaziun religiosa tles scolines, inciariada ai esperc pedagogics, y dl’insegnamënt dla religiun catolica tles scores publiches.
Les diretives prinzipales sön l’insegnamënt dla religiun catolica tles scores dla Provinzia de Balsan é contignües tles normes d’atuaziun dl Statut d’Autonomia, tles leges provinziales y ti decrec dl presidënt dla Provinzia. L’acordanza sotescrita incö (ai 02 de otober) regolamentëia por le pröm iade i aspec desvalies dl’educaziun religiosa tles scolines y dl’insegnamënt de religiun tles scores publiches y profescionales dla Provinzia. „Chësta acordanza sará la basa de colaboraziun danter la Provinzia dl Südtirol y la diozeja Balsan-Porsenú por ci che reverda l’educaziun religiosa y l’insegnamënt dla religiun“, á splighé le presidënt dla Provinzia Arno Kompatscher tratan l’incuntada incö tl Palaz Widmann a Balsan.
N punt important, che é gnü inserí tl’acordanza, reverda la formaziun di insegnanc dles scores elemetares y dles educadësses dles scolines. La formaziun de competënzes pedagogiches religioses sará insciö na pert d’oblianza dl master dl stüde dles sciënzes dla formaziun primara dla Facolté dles sciënzes dla formaziun dl’Université lëdia da Balsan. Chësc por sensibilisé les educadësses dles scolines y i insegnanc dles scores elementares sön l’importanza dla religiun y sön l'aprofondimënt dles chestiuns fondamentales dla vita y dla conceziun dl monn da n punt d’odüda filosofich y teologich te na manira adatada por mituns. „Te degun momënt ne él indere gnü planifiché n’inserimënt dl insegnamënt de religiun tles scolines“, á prezisé le presidënt Kompatscher injuntan: „L’educaziun religiosa tles scolines dl Südtirol fej pert, en desfarënzia co tl rest dla Talia, dl’inciaria de formaziun dl personal pedagich“. Tl rest dla Talia vëgn la formaziun religiosa insegnada tles scolines da pert de insegnanc de religiun aposta.
„L’insegnamënt dla religiun catolica ne é nia n gest generus dla Provinzia o n privilegh dla Dlijia, mo al é na pert integranta dl’inciaria dla scora“, á dit le vësco Ivo Muser. L’educaziun religiosa é importanta sides por la singula porsona co ince por la sozieté y na premissa fondamentala por la democrazia, insciö Muser. „Na democrazia vitala depënn da na trasmisciun dles tradiziuns dl ponsé, dles esperiënzes sensitives y de regoles de comportamënt. La religiun é na fontana irenunziabla por la sozieté, che va sura la porsona fora. La renunzia a n’orientamënt religius ne é insciö nia na garanzia por na modernité plü ampla y por l’umanité de na sozieté“, á injunté le vësco. „Tles scolines y tles scores ti vëgnel insciö dé na lerch al insegnamënt dla religiun por sensibilisé y formé poscibilmënter düc i mituns y i jogn te chësc vers. La garanzia de chësta lerch é la sora y unica intenziun dl’acordanza sotescrita incö danter la Diozeja y la Provinzia“, á stlüt jö le vësco Ivo Muser.
Tl’acordanza vëgnel prezisé che na renunzia de n scolar o na scolara ala partezipaziun al insegnamënt de religiun mëss gní comuniché cina ai 30 de jügn. Detlaraziuns de renunzia dades jö plü tert ne vëgn nia tutes en conscidraziun.
rc
Galaria dales fotografies
