Presentaziun dl’edema dl Bausparen ai 12 d’otober a Balsan
Da plü co 100 dis él en funziun tl Südtirol le model nü dl Bausparen che á registré cina sëgn n gran interes. Le presidënt dla Provinzia Arno Kompatscher y le vizepresidënt Christian Tommasini presentará ai 12 d’otober te na conferënza stampa n pröm bilanz provisore dl model nü y l’edema dedicada aposta al Bausparen.
En lönesc ai 12 d’otober mët man l’edema dedicada aposta al model nü dl Bausparen y che gnará stlüta jö ai 16 d’otober en contlujiun dla fiera dl frabiché abitatif tl Waltherhaus a Balsan. Le model nü dl sostëgn por le frabiché é en funziun te Südtirol da messé dl 2015 y é ponsé dantadöt por i zitadins cun n paiamënt massa alt por fá domanda por contribuc publics y tl medemo momënt massa bas por podëi se pormët la cumpra de n’abitaziun sön le marcé lëde. Tres chësc sistem él insciö poscibl por i zitadins da s’anuzé dl fonds dla ponsiun complementara por ciafé n imprëst a dër de bunes condiziuns por la costruziun, la cumpra o le ressanamënt dla pröma ciasa.100 dis do le start dl Bausparen presentará le presidënt dla Provinzia Arno Kompatscher y l’assessur por le frabiché abitatif Christian Tommasini n bilanz provisore dl model nü y dauriará l’edema dedicada aposta al Bausparen. La conferënza stampa de presentaziun di dac plü atuai dl Bausparen y dl program dl’edema d’informaziun gnará tignida
en lönesc ai 12 d’otober
dales 10.00
tl salf stampa dl Palaz provinzial 1
plaza Silvius Magnago 1
a Balsan.
rc
