Dala Junta: Maraties che vëgn dant dainré, trëi zëntri nüs a Balsan
Dal 2004 colaborëia les Provinzies dl Südtirol y dl Trentin cun les regiuns dl Venet y dl Friul ti seturs dla prevenziun, dla diagnosa y dla cura dles maraties che vëgn dant dainré. La Junta Provinziala á nominé incö (6 de otober) trëi zëntri de referimënt nüs suraregionai che ará süa sënta tl ospedal da Balsan.
Les Provinzies de Balsan y Trënt laora adöm cun les Regiuns dl Venet y dl Friul-Aunejia-Iulia por otimisé les ressurses desponibles por la cura, la diagnosa y la prevenziun de maraties che vëgn dant dainré. Chësta acordanza prevëiga le posizionamënt sön döt le teritore dles trëi Regiuns de zëntri de cura por düc i zitadins dl’area interessada che sofrësc chëstes maraties. Ara se trata de patologies che, aladô dla definiziun dla Uniun Europea, vëgn dant pro zirca 5 paziënc sön 10mile abitanc. Pro la maiú pert se tratél de maraties genetiches che vëgn aratades croniches, degeneratives y limitatives.
I paziënc adora prësc dagnora n’asistënza permanënta de y nöt y porchël á la EUCERD (European Union Commitee of Expert on Rare Diesease) tut la dezijiun de cherié zëntri de referimënt acreditá a livel regional por vigni maratia spezifica. Por ci che reverda la Provinzia de Balsan é i zëntri gnüs istalá tl ospedal da Balsan.
La Junta Provinziala á aprové incö (6 de otober) la deliberaziun che ajornëia la lista di zëntri de referimënt y che ajuntëia la cura de trëi maraties nöies che vëgn analisades tl ospedal da Balsan: al se trata de zëntri de cura por maraties raes dl metabolism di minerai, maraties raes dl sanch y por malformaziuns raes dla pel.
rc
