Dala Junta: metüda en sigurté dla strada statala dl Prener a Blumau
Por garantí na maiú segurëza ala zircolaziun sön la strada statala dl Prener da Balsan en direziun de Tlüses tla zona de Bluman á la Junta provinziala definí incö (06/10) n valgügn intervënc de prescia, danter chisc la realisaziun de n mür de proteziun cuntra les peres y le spostamënt dl tru dles rodes.
Chisc intervënc de metüda en segurëza é nezesciars sciöche proteziun dala tomada poscibla de peres sön la statala dl Prener danter Balsan y Tlüses, öna dles strades de coliamënt plü importantes dla Provinzia. I laurs de proteziun é gnüs aprová incö, mertesc ai 06 de otober, sön proposta dl assessur provinzial Florian Mussner. Dan da püch á la strada statala 12 messü gní sarada por n valgügn dis danter Balsan y Blumau por gaujia dl pericul dla tomada de peres. Cun la realisaziun de chëstes mosöres ajuntives dessel gní assiguré che la strada ne mëss nia plü gní stlüta tl dagní.
La Junta provinziala á ince definí les carateristiches tecniches por la costruziun de n mür de proteziun cuntra la tomada de peres lunch 400 metri y alt 5 metri. Le tru dles rodes gnará sposté. La Repartiziun Sorvisc Strades dla Provinzia laurará fora n proiet d’esecuziun por chëstes mosöres de prescia. I cosć dles operaziuns é de söporjö 1,4 miliuns de euro. Le presidënt dla Provinzia Arno Kompatscher á rengrazié düc i ofizi competënc por la daurida asvelta dla strada y por l’elaboraziun dl program de segurëza nü.
La costruziun é conzepida por garantí na proteziun adatada al trafich cuntra la tomada de material sön la trata danter Balsan y Bluman dla strada statala 12. La segurëza á la mascima priorité sön les strades dl Südtirol, recorda l’assessur Florian Mussner. „Te n raiun da munt sciöche le Südtirol pó na tomada de peres tres suzede, mo nos fajun döt le poscibl por garantí la proteziun plü alta poscibla.“
rc
