Dala Junta: Löm vërda al ressanamënt dl depuradú de Pontives
La Junta provinziala á aprové incö (ai 6 d’otober) l’ejame dla valutaziun dl impat ambiental dl proiet d’ampliamënt y de restrotoraziun dl depuradú de Pontives y dl proiet por le potenziamënt dl implant de telescialdamënt de Balsan.
Le proiet por l’ampliamënt y la restrotoraziun dl depuradú de Pontives te Gherdëna é gnü presenté sön proposta dl manajadú Ecocenter Spa. La Junta provinziala á aprové incö (ai 6 d'otober) le proiet, do che ince le Comite por l’ambiënt á de n arat positif ala fin de setëmber y spezifiché n valgönes prescriziuns da tigní ite. I laurs de costruziun pó ma gní fac al intern dl’area esistënta dl depuradú y tól ite danter l’ater la realisaziun de n implant de tratamënt di paltans, n frabicat nü por la spartiziun de sostanzes y na spersa nöia por l’ega dla plöia do prezipitaziuns dër granes. Implü gnarál ince ressané les strotöres por i tratamënc biologics y al gnará ince realisé n frabicat nü por laboratori y locai de control. „Chisc adatamënc é nezesciars deache l’implant de Pontives á registré n valgügn problems cun le tratamënt de paltans atifs, che á porté de conseguënza a problems cun i valurs dles emisciuns, á splighé l’assessur por l’ambiënt Richard Theiner. La depuradú de Pontives pó gní adoré por na soma de indöt 75 mile abitanc.
Implü á la Juntra provinziala ince aprové incö, do l’arat positif da pert dl Comite por l’ambiënt, le proiet de potenziamënt dl implant de telescialdamënt de Balsan. Le proiet prevëiga n ampliamënt dl sistem de telescialdamënt, l’adatamënt di implanc bele esistënc y la realisaziun de strotöres nöies. "Le potenziamënt dl implant da Balsan - sotlignëia l’assessur Theiner - porta para a n smendrimënt dl’adoranza de material combustibl y a n aumënt dla cualité dl’aria de Balsan." Le proiet de potenziamënt scrí dant prescriziuns spezifiches che reverda le respet de valurs mascimai dles emisciuns, dl incuinamënt acustich y dles eghes de desciaria.
rc
