Dala Junta: OK al implant de simulaziun de condiziuns climatiches estremes
Realisé n implant de simulaziun che reprodüj les condiziuns climatiches plü estremes: chësc é le proiet dl Istitut por la medejina d’emergënza alpina dl’EURAC che gnará finanzié dala Provinzia de Balsan cun n investimënt de 5 miliuns de euro. Retüda economica y vari inant tl svilup dl’archirida scientifica é i vantaji prinzipai.
L’obietif dl proiet é chël da realisé na strotöra de test dal inom EURAC Extreme Environment Simulator y che reverda n implant de simulaziun cun döes ciamenes ipobariches bunes da reprodüj condiziuns dl clima estremes: dal cialt dla Sahara al frëit dl Polo nord, dala presciun atmosferica sön le livel dl mer a chëra che an ti vá adincuntra sön la piza dl munt Everest. La Junta provinziala á aprové incö ai 6 d’otober n finanziamënt de püch sura i 5 miliuns de euro, cater de chisc é nezesciars por la realisaziun dles döes ciamenes. La strotöra sará operativa dal mëteman dl 2018, i cosć gnará finanziá dala Provinzia de Balsan. „Al se trata de ressurses finanziares dër bun investides, deache l’implant de simulaziun sará n produt d’ezelënza dl’archirida scientifica internazionala y che fará aldinfora dl Südtirol n punt d’atraziun dla medejina d’emergënza alpina“, insciö le presidënt dla Provinzia Arno Kompatscher.
Les döes ciamenes climatiches gnará inserides al intern dl Parch tecnologich y la particolarité é che ares ne podará nia ma gní adorades por ativités d’archirida mo ince por ci che reverda inrescides de aplicaziun a livel d’industria: por ejëmpl por ci che reverda tesć climatics sön produc sportifs, auti y strotöres mecaniches de gran dimenjiuns. „I cosć de gestiun dla strotöra sará de 400mile euro al ann, mo le davagn preodü dal marcé nes lascia ipotisé che al sará poscibl da curí completamënter i cosć dl implant sön la dorada lungia“, insciö Kompatscher.
rc
