Dala Junta: aeroport, laurs de manutenziun cina la fin de novëmber
I laurs de manutenziun dla pista de ateraje y start dl aeroport da Balsan dess gnis stlüc jö cina la fin de novëmber. Chësc é gnü anunzié incö (ai 6 de otober) dal presidënt Arno Kompatscher che á sotligné inant che al se trata de „intervënc bele planificá che ne á nia da nen fá cun n ampliamënt ipotisé dla pista.“
Sciöche bele anunzié tratan i mëisc da d’isté á i laurs de manutenziun y de metüda en segurëza dla pista de ateraje y de start dl aeroport de Balsan scomencé ala fin d’agost. „Al se trata de intervënc planificá y damaná dal’ENAC – á sotligné le presidënt dla Provinzia Arno Kompatscher ala fin dla sentada dla Junta provinziala – y che ne á nia da nen fá cun n’ampliamënt eventual dla pista, sciöche al vëgn ipotisé chisc dis.“ Tres en relaziun al aeroport de Balsan, á sotligné le presidënt Kompatscher, gnarál a se le dé n’aldiziun tl Consëi provinzial ai 20 d’otober.
„Te chësta ocajiun – á prezisé Arno Kompatscher – gnarál ince presenté le proiet y la strategia de svilup dl aeroport, adöm cun le business plan dla sozieté ABD.“ Implü gnarál ince scomencé tl Consëi provinzial la discusciun sön n dessëgn de lege, che ne gnará te n pröm momënt nia aprové dal Consëi provinzial. L’iter prevëiga insciö che i zitadins dess dé jö süa valutaziun sön le ddl tres n referendum popolar, che „dess gní tigní tl 2016“, insciö le presidënt Kompatscher.rc
