„Nuj“ revista culturala nöia sön i jogn artisć dl Südtirol
La revista culturala nöia „NuJ“ é scrita te plü lingac, danter chisc ince por ladin y da ladins, y pita na plataforma de presentaziun a de plü artisć jogn dl Südtirol. Ara vëgn dada fora un n iade al ann cun indöt 3.000 ejemplars. La pröma ediziun é gnüda presentada dan da püch a Urtijëi dal assessur provinzial Philipp Achammer.
La revista culturala „Nuj“ é ponsada da ester na finestra sön l’ativité culturala di jogn dl Südtirol. Na particolarité dl produt é l’adoranza de plü lingac dl panorama artistich di jogn dl Südtirol. I artisć presentá é desvalis, implü pón s’informé sön manifestaziuns y scomenciadies locales y regionales. Plü odüdes interessantes vëgn ince pitades sön les realtés artistiches dl Tirol y dl Trentin. La revista culturala vëgn publicada un n iade al ann cun indöt trëimile ejemplars te plü lingac.
La pröma ediziun dla revista culturala nöia „Nuj“ é gnüda presentada dan da püch a Urtijëi dal assessur provinzial Philipp Achammer adöm al team dla redaziun coordiné dal Ofize cultura dla Repartiziun Cultura todëscia dla Provinzia y en presënza de n valgügn artisć presentá tl’ediziun nöia. „L’obietif dl produt editorial nü é chël da ti dé la dërta visibilité y valënza ala cultura di jogn che é na pert fondamentala dl panorama cultural local“, insciö l’assessur por la cultura Achammer. Tl pröm numer dla revista vëgnel presenté de plü jogn che é atifs ti seturs plü desvalis dla cultura, dl'ert y de atres ativités culturales. La revista „Nuj“ pó gní consultada te süa verjiun digitala tres la plata web: www.provinz.bz.it/NUJ
rc
