La mostra 1915 -2015 ie da udëi tla Galaria Prisma nchin ai 31 de utober
Euforia, pudëi, mputënza y decadënza ntan la viera ie la tematiches prejentedes tla mostra 1915-2015: da udëi iel l'operes premiedes n ucajion dl cuncors artistich sun l centené dla Prima viera mundiela metù a jì dala Repartizion Cultura y Intendënza ladina y dal Südtiroler Künstlerbund. L assessëur Florian Mussner à giaurì la mostra ai 9 de utober tla Galaria Prisma a Bulsan.
L se cunfrunté cun la viera y si fazions y cunseguënzes ie la tematica zentrela de chësta mostra. Tla formes dla pitura, dl’ert ogetuela y de lëures video ti vëniel dat vijibltà ala ferides dla viera. L ie da udëi la operes dl'artistes y di artisć Paul Feichter, Silvia Hell, Annemarie Laner, Walter Pancheri, Leander Schwazer, Martina Stuflesser, Letizia Werth y Andreas Zingerle.
Tres i lëures dl’artistes y di artisć vën la tematica tribulënta dla Prima viera mundiela propi mustreda a na maniera viva y cuncreta, à dit Florian Mussner, l assessëur ladin per l’Educazion y la Cultura ladina n ucajion dla giaurida dla mostra. “Ulon sustenì cun ch’sta mostra artistes y artisć jëuni y tl medemo mumënt lecurdé i avenimënc dla viera, ma nce trasmëter n messaje de pesc”, à sotrissà Mussner. “Śën y tl daunì messons fé dut per ressolver deberieda i cunflic y chësc uel dantaldut nce dì cunëscer la storia, ajache cie che ie suzedù un n iede possa for suzeder mo n iede”, à dit l assessëur Mussner che ti à nce fat i cumplimënc al’artistes y ai artisć per si lëures garatei.
L departimënt Educazion y Cultura ladina ova scrit ora l “cuncors artistich 1915 – 2015” adum cun l Südtiroler Künstlerbund per mantenì viva la lecurdanza dla Prima viera mundiela, che à scumencià dan 100 ani, y per elaburé artisticamënter y visualisé si cunseguenzes y la maniera de ti jì permez. Partezipé al cuncors à pudù duta l’artistes y duc i artisć dl Südtirol y dla valedes ladines dl vedl Tirol.
L’artistes y i artisć jëuni de chëi che i lëures ie śën metui n mostra tla Galaria Prisma a Bulsan, se à dat ju a fonz cun i avenimënc storics y la ntraunides atueles: sibe cun la vieres passedes che cun chëles dl presënt – i destins dla populazion zevila, la emozions danter cumpascion y sënn, la gaujes y la giustificazions ie for la medemes y te chësta mostra vën la viera, si fazion y si cunseguënzes presentedes te si fassëtes defrëntes.
La mostra, cureda da Lisa Trockner, resta davierta nschin ai 31 d’utober da n merdi a n sada dala 10.00 ala 12.30 y dla 16.00 nchin ala 19.00.
USP
Galaria dales fotografies
Foto: USP/rc
