Le scioz de San Jênn: na publicaziun nöia arjigna l’opereta por la paladina
Laurada sö dal punt d’odüda scientifich, cun na cornisc musicala nöia y arjignada por la paladina: insciö se mostra sëgn l’opereta „Le scioz da San Jênn”. Dan da püch á i auturs Fonso Willeit, Paul Videsott y André Comploi presenté a La Pli de Mareo la publicaziun nöia de „Le scioz da San Jênn” che é gnüda laurada fora en colaboraziun cun le Museum ladin Ciastel de Tor.
L’opereta ladina „Le scioz da San Jênn” é gnüda scrita dan da 130 agn da Angelo Trebo (1862 – 1888) y Jepele Frontull (1864 – 1930) á scrit la musiga lapró, mo ara n’é mai gnüda publicada. Ti agn 1994/95 é l’opereta gnüda metüda en scena por l’ultimo iade y ara á tres ciamó n gran valur d’identificaziun pro la popolaziun ladina. N gran contribut por le mantignimënt dl’opereta á dé le componist Fonso Willeit che é sté bun da recostruí ti agn cincanta feter daldöt les melodies y chësc por mirit de süa uma Clara Palfrader Willeit (che â cianté para pro les rapresentaziuns dl componist Frontull).
„Cun l’aiüt de Fonso Willeit él sté meso da restabilí la pert musicala y da la completé cun composiziuns personales, deperpo che le professur de ladinistica Paul Videsott á lauré fora le test original de Angelo Trebo“, spliga le diretur dl Museum ladin Stefan Planker, che á presenté dan da püch deboriada cun i auturs Fonso Willeit, Paul Videsott y André Comploi la publicaziun nöia a La Pli de Mareo.
„Pro l’ediziun musicala y leterara nöia röiel ciamó dui aspec interessanc: impröma l’elaboraziun scientifica dl’opereta da pert dl espert de teater y musiga André Comploi, che á tematisé la vita di auturs, la storia dl’origina, le contignü y la musiga dl’opereta“ dij Planker. Le musizist Alessandro Trebo á implü scrit na partitöra dl’opera che vá bun por rapresentaziuns cun de pici ensembles cina organics d’orchestra mesans cun alplü 60 comëmbri y vigni porsona interessada ti pó pormez tl museum. „‚Le scioz de San Jênn’ á sëgn dötes les carateristiches por gní inscené danü y i s’aodun che n dirighënt ois tosc realisé chësc proiet“ spliga Katharina Moling dl Museum Ladin, che á coordiné le proiet. Pro la presentaziun dl liber s’á cruzié dl intratignimënt musical le cor de dlijia da La Pli de Mareo y i jobleri dles ultimes rapresentaziuns di agn 1994 y 1995.
La publicaziun nöia dl’opereta „Le scioz da San Jênn” é gnüda scrita te dui lingac (ladin y todësch) y dötes les porsones interessades la ciafa da cumpré tl Museum Ladin por 18 euro. De plü informaziuns sön le Museum Ladin ciafëise sot a www.museumladin.it, na vijiun generala sön düc i atri museums tl Südtirol él da ciafé sön le portal di museums sot a www.museen-suedtirol.it.
USP
Galaria dales fotografies
Foto: (USP/Katharina Moling)
