Dala Junta: liber fondiar, da otober inant azes ince tres le tru telematich
Da en mercui ai 21 d’otober podará düc i notars dl Südtirol y de düc i Comuns catastals dla Provinzia mené inant tres na prozedöra telematica düc i documënc y ac che reverda les domandes d’inserimënt tl Liber fondiar. La perioda de proa scomenciada de má dl 2015 á dé na seria de resultac positifs y la Junta á insciö tut la dezijiun incö (ai 13/10) da amplié le sorvisc.
Aladô dla lege pó les domandes d'inserimënt de documënc y ac tl liber fondiar nia ma gní presentades tres la spediziun sön papier dla documentaziun damanada mo ince tres na prozedöra telematica. Conscidran che la lege regionala scri dant che les provinzies autonomes á la poscibilité da stabilí i vari d’ativaziun dl sorvisc, â la Provinzia de Balsan tut la dezijiun da planifiché na perioda de proa dla prozedöra digitala nöia sciöche fasa de sperimentaziun. La perioda de proa por l’ativaziun dl sorvisc ajuntif, scomenciada de ma dl 2015, ê limitada ma a n valgügn ofizi de notars y ai Comuns catastals de competënza dl Liber fondiar da Maran y Schlanders. Le software por la spediziun telematica dles domandes dl liber fondiar é gnü istalé y porvé fora da dui ofizi de notars de Trënt y Balsan en colaboraziun cun les Ciamenes di notars da Balsan y Trënt.
Deache la fasa de sperimentaziun é gnüda stlüta jö cun resultac positifs á la Junta provinziala tut la dezijiun incö (ai 13 d'otober), en acordanza cun les Ciamenes di notars da Balsan y Trënt, da amplié chësc sorvisc ajuntif dai 21 d’otober inant a döt le raiun provinzial por ci che reverda la spediziun telematica de domandes d’inserimënt de documënc y ac tl Liber fondiar. La proposta é gnüda portada dant dal assessur competënt Christian Tommasini. La trascmisciun digitala dla documentaziun, che é na poscibilité ajuntiva a chëra tres la spediziun di documënc sön papier, pó gní anuzada da düc i notars dla Provinzia de Balsan, de düc i Comuns catastals de competënza di ofizi dl Liber fondiar dla Provinzia, y reverda dötes les tipologies de ac sciöche ince i raporc di ofizi dl Liber fondiar stabilis aladô dla lege.
„Al se trata de n vare dër important tl vers de na modernisaziun digitala di ac y di raporc di ofizi che se crüzia dl Liber fondiar y dl Cataster. Chësc proiet porta ince para n smendrimënt dla burocazia por merit dles tecnologies nöies y á implü efec positifs sön les prozedöres internes y sön le mioramënt dl’organisaziun dl laur de düc i ofizi interessá“, sotlignëia l’assessur Tommasini.
rc
